O se tasi lenei o polokalame mo tupulaga talavou mai soo se ekalesia i Samoa, o loo maitauina pea le alualu i luma aemaise o le maoa‘e o le tomai ma agavaa faaonapo nei, o loo faatinoina ai. Ua siliga ma le sefulu tausaga talu ona fofoa mai lenei moemitiga mo se polokalame faapitoa mo le autalavou.
O le Aso Faraile na se‘i mavae atu, na tatalaina aloaia ai le faatauina o le lipine video poo le DVD o le tauvaga tele o le Samoa Youth Alive i se polokalame sa faatinoina i le malumalu o le ekalesia Hallelujah Worship Centre i Otahuhu. Sa faatumulia le mamalu o le atunuu e molimauina lea faamoemoe tele.
Sa malaga mai Samoa le Taitai o le polokalame, Pastor Siagigi Vaafusuaga ma tuufaatasia le polokalame ma nisi o le Komiti i Niu Sila aemaise faafeagaiga o Ekalesia Worship Centre i NZ.
Sa faatinoina i lea polokalame nisi o aitema aemaise tala faatino ma faatauina ai le DVD i se tau faapitoa e $25 i le seti e 2 dvds.
O lenei tauvaga tele sa faataunuuina i le masina na sei mavae atu nei o Iulai i lumā Maota o le Malo i le Eleele Fou. Mo le silafia o lenei tauvaga sa siamupini ai le ausiva Katoliko mai Taufusi o le Holy Family Crew i le vaega o siva toatele i le $10,000 ae siamupini le Double Star mai Puipaa i le vaega o siva taitoa 2 poo le toa 3 i le $3000.
O le faatulagaina lea o le tauvaga i faailoga lautogia i lenei tausaga 2014:
Vaega o Siva toatele:
1. Holy Family Crew – Taufusi $10,000
2. United Uso – Soo se Alalafaga $6,000
3. Kingdom Light – Vailele $4,000
4. L.O.S Texas – Magiagi $2,000
5. Ola i le Tala lelei – Sapapalii $1,000
Vaega o Siva Taitoalua/toatolu:
1. Double Star – Puipaa $3,000
2. Brothers and Sister – Satapuala $2,000
3. Theological Boys – Malie $1,000
E 32 le aofaiga o ausiva na sailia ai le siamupini mai ausiva e 74 na resitala i le tauvaga. O loo ua amata faatauina foi lenei DVD i le tau $30 i le seti (2 dvds) i le flea maketi i Magele i Aso Toonai uma o vaiaso taitasi mo le mamalu o le atunuu e fia maimoa i lenei tauvaga maoae.
E mafai foi ona maua se faamatalaga mo isi nofoaga o loo faatauina ai lenei lipine pe a fesootai le telefoni feaveai 0223087788.
