Taui le alofa i le tuliloa e totogi le nonogatupe a lana uo

Ua fai pea ma to‘atuga ma faafitauli ogaoga i nisi latou te faamaonia ni nonogatupe poo ni aitalafu a nisi ona o se uo mamae, poo ni tauaiga foi, le tu faafuasei atu o le tusi, e sauni o ia o le a totogiina le aitalafu ona ua faaletonu le tagata e ana le nonogatupe.
E faapena mafatiaga o loo feagai nei ma se tasi o tamā, le susuga Filipo Strickland na ia faamaonia nonogatupe e lua a lana uo o Samuelu Sam Peti Tupa‘i, ua tuua Samoa i nai tausaga ua mavae ae malaga atu i Niu Sila, ae ua faaletonu ai le totogiina o ana aitalafu i le Faletupe o Atina‘e ma le faalapotopotoga o fale le Housing Corporation.
Ua faaalia e Filipo ua tuuina atu le aofaiga uma o ia aitalafu e lua e silia i le tolusefulu afe, ma o se avega mamafa o le a feagai nei ma ia i le tau totogi o ia nonogatupe a lana uo o Samuelu. Ua oo le mataupu i le faamasinoga i se tasi o nonogatupe, ma ua poloaina ai Filipo e le faamasinoga ia saili se fesootaiga ma lē e ana le aitalafu ina ia tatau ona maua se faamatalaga pe faapefea le faaletonu ua tulai mai. Ua talosagaina ai e Filipo Samuelu Sam Peti Tupa‘i poo fea o Niu sila ma Ausetalia poo Amerika foi, ia fesootai mai ia te ia i le ofisa o le Polenisia i le fogafalelua o le NPF i Apia o loo faigaluega ai.
Faaalia e le tamā o Filipo, e iai foi ana nonogatupe e totogi, ma a faaopoopo nei i ai ma le faaletonu ua aliali mai, o le a lē iloa pe faapefea ona maua se seleni e ola ai ma lona aiga. Ua toatele tagata sa latou faamaonia aitalafu a isi, ua mafatia i tulaga faapenei.
Na lavea ai ma le tusitala i se mataupu faapenei i se nonogatupe a se tagata e nofo i se afioaga i Aleipata. O le nonogatupe na fai i le Faletupe o Atina‘e, peitai ua fiu le faletupe e tulituli le tagata ua lē mafai ona totogi le aitalafu. O le faaiuga na totoo loa i le tagata na faamaonia le aitalafu mo se laveai.
O le faalavelave o mataupu faapenei sa tatau ona faato‘ā totogi e lē na faamaonia poo le guarantor pe afai ua maliu, pe alu i se isi atunuu le tagata e ana se aitalafu. O le mea foi e ofo ai poo fea le tulafono o femalagaaiga o loo aiaia ai, e lē mafai e se tagata ona tuua Samoa pe afai o loo nofo aitalafu i se faletupe, se kamupani poo le Malo a o lea e mafai lava ona malaga i fafo tagata e aunoa ma le taofia se‘i totogi muamua ia mae‘a ana aitalafu ona faato‘ā alu ese lea ma Samoa.