Taui e fanau le tautiga o mātua e ala i le poto ua maua

Clayton Futu Chan, Emmanuel Sakaio, Fiapaipai Ruth Auapaau, John Patrick Luteru, Sosefina Andy
Clayton Futu Chan, Emmanuel Sakaio, Fiapaipai Ruth Auapaau, John Patrick Luteru, Sosefina Andy

O tua atu o tiga ma faigata, o loo taoto mai ai manuia ma ata o taulelei. O le faatalitali foi ma le onosai e pale i le manuia ma maua le taui lelei. E lei faigofie le tapuaiga a mātua, a’o lo latou nofo tatalo foi ina ia aua ne’i faalogologo tiga ma vave faamamulu fanau a’o iai i le taua o mafaufauga i le faalauteleina o le poto salalau i totonu o nei atunuu auā so latou lumanai manuia. O le unai a mātua faatasi ai ma lo latou lagolago malosi ia latou fanau na teu fatu ai i loto o fanau e iai le manaoga o mātua mo latou i le lumanai e musu e aua ne’i ola falolo se tasi.

O le tolu tausaga e le o se mea faigofie, o lagona ia o le fanau sa faauuina mai i le AUT i Aukilani i le faaiuga o le vaiaso ua mavae. E tele faigata ma fita lavelave o le aoga, auā e iai taimi e oso ai le augata e fai meaaoga aemaise lava i taimi o galuega ae toe foi atu punou e fai meaaoga. O le lu’i tele mo latou o le vaai atu lea i le usu o mātua i le malulu i galuega e tau atinae ai aiga mo nei atunuu.

O nisi o fanau o loo teu foi le upu o latou mātua e faapea, o nei atunuu e le aogā ai se tagata paie ma le tagata faalagolago le tasi i le tasi, e aogā i le tagata sogasoaga ma ola le mafaufau ma faaaogā lelei le avanoa na oo mai ai i nei atunuu.

Nisi o mātua sa auai atu i le faauuga o latou fanau
Nisi o mātua sa auai atu i le faauuga o latou fanau

O le manogi lea o le ola mai i mātua ua oo atu i fanau ma ua atili ai lo latou finafinau ina ia taunuu i le tini o le tamoega ma faataunuu le moemitiga a mātua mo latou.

Ua taunuu ai le upu a le tusi o le manogi o le ola e oo atu ai le ola i isi tagata, o le laulaufaiva foi o le ola ma le oti lea, auā o le upu o le ola na sau mai le laulaufaiva o mātua ia manuia ai aoga a fanau o lea foi ua iu ai ma le manuia lo latou tausinioga i lenei umi tausaga sa tau ai.

E tele atunuu eseese sa auai i le faauuga, ae filofilo ai ma fanau Samoa, lea sa maitauina ai le lolofi atu o mātua ma aiga e lagolago ma opogi le latou faauuga lea sa faia i le Aotea Centre i le taulaga o Aukilani i le vaiaso ua mavae. O nisi sa tauaao o latou faailoga i le Aso Tofi a’o nisi sa tauaaoina i le Aso Faraile.

O nei aso uma, sa le misi ai fanau Samoa, ma o le ata vaaia lea o loo maitauina ai o loo toatele alo ma fanau Samoa o loo faaaogāina tatau nei avanoa e faalautele ai lo latou malamalama ma finau ai i nisi galuega lelei aua le manuia o aiga.

O loimata o le fiafia o mātua sa vaaia i nei aso e lua, na feiloai atu ai i fanau ma momoli le latou faamalo i le tausinioga sa fai nei i le umi o tausaga, ma le upu e faapea, e le tuulafoaina e le Atua lana fanau. O le ola faaeaea o fanau ua siitia maualuga ai ma aiga aemaise o mātua sa latou tu’i le mulipapaga a’o feagai i latou ma aoaoga. O nisi o fanau sa feiloai atu iai le tatou nusipepa, o le tamaitai ia Sosefina Andy sa faauuina mai i le faailoga o le Bachelor of Art and Design (Honours) (First Class), o Clayton Futu Chan na faauuina mai lona faailoga o le Postgraduate Diploma in Science, o Fiapaipai Ruth Auapaau sa faauuina i lona faailoga o le Bachelor of Science (in Applied Conservation and Marine Biology), o John Patrick Luteru sa faauuina i lona faailoga o le Bachelor of Sports and Recreation (Health and Physical Education), ma Emmanuel Sakaio sa tauaaoina foi lona faailoga o le Bachelor of Sports and Recreation (Management).

O le agaga fiafia o nei fanau na momoli ai lo latou loto faafetai i le tapuaiga a o latou mātua faapea aiga ona ua iu ma le manuia lo latou taumafai, ma o le alo atu loa e tau le taua o galuega e faaaogāina ai lo latou tomai lea ua mauaina ai latou faailoga. Ma se’i tau totogi le tau i mātua sa ala mai ai manuia aemaise o le latou tausiga.