O le manumalo mataina a le Toa Samoa ia Toga i Parramatta na faamalosia ai le mau e tusa lava pe taofiofi e kalapu e pei o Brisbane Broncos tama e pei o Anthony Milford, e toatele lava isi alo agavaa e tauaveina le igoa o Samoa.
Na atagia lea mau i le lelei o le taalo a le Toa Samoa lea na silisili ai le mataina ma le lelei o lana puipuiga o lana laina sikoa e ui na muamua sikoa le uigi a Toga ia Pangai i le lima minute muamua ma sili ai ‘ai i le 6-0.
Sa amata popole le tapuaiga na molimauina lenei taaloga i Paramatta, lea sa lolofi atu ai le silia ma le 15,225 o le aumaimoa. Ae mo le isi fitusefululima minute na pei o le ‘olo e fau i maa le malosi o le puipuiga a le Toa.
Mai lava i le taimi o Vii o atunuu e lua lea na pepese ai le Ekalesia Metotisi mai Blacktown faapea Siva Tau a ‘au, na matuā taalili le pisapisao o tapuaiga. Ua atili ai i le taaloga amata na manumalo ai Papua Niu Kini e 24 i le 22 a Fiti. Ae pei o Toga lava ma Samoa na faatalitali uma i ai.
E lē gata o le lapopoa ma le maualuluga o le ‘au a Mate Ma‘a Tonga ae na lē foi ai le pue afifi ma le galulu o le malae i taimi e fetoai ai ma tama o le Toa.
O le kapeteni ia Frank Pritchard ma lana paga ia Sam Kasiano na toe vaaia foi le taulamua i lenei taumafaiga maoae. E ui na o le 53% le umi o a latou pasipasiga ae na malu lava le pue.
Saunoa foi le faiaoga ia Matt Parish, “E uigaese le naunau na iai le ‘au i luga o la latou laina ma faigata ai e Toga ona toe sikoa.”
O le uigi a le Toa o Antonio Winterstein, na sikoa muamua mo Samoa ma tutusa ai ‘ai o le taaloga 6-6 faatoa toe ova ai se sala na kiki e Faamanu Brown lea na mauaina le faailoga o le tama taalo o le taaloga mo ‘ai e 8-6 i le ‘afa muamua.
O le sao foi a ausiva mai Tonga ma le Evana sa faafiafia i le malologa na avea ma se itu matagofie, sosoo ai ma faleaitu a Tofiga Fepuleai na malaga mai Niu Sila.
Na atili faateteleina le malolosi o tamomoe ma pue a ‘au i le ‘afa faaiu ma sikoa mataina ai le uigi o Ricky Leutele i le tulimanu mo ‘ai e 14-6.
O le sikoa faaiu na maua lea e le isi uigi ia Matthew Wright mo ‘ai o Samoa 18-6. Na tau vevesi le taaloga ina ua tulivae e Solomone Kate le numera tolu a Tonga, ia Kirisome Auvaa ae na toe faalelei. O nisi o sui fou o le Toa na vaaia le mataina o taumafaiga e aofia ai Erin Clark faatoa sefuluvalu tausaga faapea Kaysa Pritchard, Raymond Faitala Mariner lea e taalo i le Bulldogs.
O i latou lenei e moomia tele mo tapenaga atu mo le Ipu o le lalolagi i le tausaga fou. E lē gata o le lagolago ma le tapuaiga a Faifeau ma Ekalesia i Sini ma isi setete i lea faamoemoe o le ‘au a le atunuu, ae na momoli foi faamanuiaga a le afioga i le Hai-Komesina o Samoa i Canberra ia Hinauri Petana ma lona ofisa lagolago ia Fata Brian Kaio.
Na afifio atu foi le afioga i le Konesula Fonoti Manogiamanu Etuale Ioane ma lona faletua faapea le Afioga i le peresetene o le Fono Aoao a Tagata Samoa i Sini ma lona faletua e molimauina le taumafaiga a le Toa Samoa.
Ae o le vaaiga matagofie o le fiafia faatasi o autapuai e lua e aunoa ma se gase pe vevesi i le amataga seia oo lava i le taimi na uma ma ta‘ape fiafia Samoa ae malolo faatamalii le tapuaiga a Toga.
Na faailoa lava foi e le Peresetene o le Lakapi Liki a Samoa, Afioga Tagaloa Faafouina Su‘a le taaloga a le Toa Samoa ma Fiti e faia i Apia i le aso 8 Oketopa 2016 auā le faamanatuina o le 30 tausaga talu ona faavae le taaloga i Samoa.
