Tauaofiaga a Molimau a Ieova – “Ia Faaa‘oa‘o iā Iesu!”

O taimi o tauaofiaga ma fonotaga faaletausaga a Molimau a Ieova, o nisi na o taimi e sili ona faatāua ma tulimataia e mātua ma fanau ma sui taitasi o le ekalesia mo le tele o mafuaaga lelei.

O le autū lava o nei faatasitasiga, o le faaopoopoina o nisi taumafa faaleagaga auā le tomatauina atili o le soifua faaleagaga o sui taitasi o le ekalesia. Ae o taimi foi nei e faatalitalia e tagata uma o le ekalesia, e feiloai atu ma feofoofoa‘i ai ma isi o latou uso ma tuafāfine mai faapotopotoga eseese i Niu Sila, ia atili faamasani ai ma fefaasoaa‘i siuleo o faalaeiauga faaleagaga mo le faatumauina lo latou soifua faatuatua ia Ieova lo latou Atua.

O le Aso Faraile, Aso Toonai ma le Aso Sa, 2, 3, 4 Oketopa 2015, sa patino mo le polokalame o le tauaofiaga i le gagana Samoa, e pei ona faagasolo ai i lo latou Maota Fono i Papakura. O le matua aoao o le tauaofiaga o lenei tausaga 2015, “Ia Faaa‘oa‘o iā Iesu!” na faavae mai lea matua i le mau faale-Tusi Paia o le 1 Peteru 2:21.

Ma o lauga uma ma vaega eseese sa faatino ai mataupu faale-Tusi Paia i lea tauaofiaga, sa taulai atu lava i le faatāuaina o lenei matua, ina ia avea o ni auauna faamaoni a Ieova, le Atua, e tāua ai i Kerisiano uma ona muai faaa‘oa‘o ia Iesu, le Alo o le Atua, auā o ia le faaataga sili o lona Tamā ma lona Atua a o iai i le lalolagi.

E 7 faapotopotoga Samoa a Molimau a Ieova i Niu Sila sa potopoto uma mai ona sui i lea tauaofiaga, e aofia ai faapotopotoga e 5 i Aukilani, 1 mai Porirua i Ueligitone, ma le isi faapotopotoga Samoa e 1 mai le motu i Saute i Kalaiesetete.

O nisi o vala fou o le polokalame o le tauaofiaga a Molimau a Ieova i lenei tausaga, o le faaaogāina o ata vitiō e faalautele mai ai lauga faale-Tusi Paia sa faia e failauga taitasi. O se auala na matauina le uai toto‘a ai o le naunau o le aofia aemaise lava i fanau talavou ma ē iti, ma vave ai ona latou pueina le agaga tonu o se mataupu na talanoaina.

O se tasi o vaega o le polokalame e tulimataia i soo se fonotaga poo tauaofiaga a le ekalesia, o le faafeiloaia o ni o latou sui fou o le a faailogaina lo latou tuuina atu e avea ma Molimau a Ieova, e ala i le faatofuina i le papatisoga i le vai. Ma o le tauaofiaga i lenei tausaga, e toavalu (8) sui fou na papatisoina ai.

E masani ai le ekalesia ona iai se vaega mo se tala faatino (drama) faale-Tusi Paia i luga o le pulelaa i soo se latou tauaofiaga. Ae o le suiga i lenei tausaga, ua faaali mai se ata vitiō ae ua faaliliuina i le gagana Samoa.

Ma o ni vaaiga sili ona faagaeetia ma tele ai foi loifofoga maligi, a o maimoaina vaaiga i taimi o femaliuai lo tatou Alii Faaola i luga o le lalolagi ma faia nisi o ana vavega ofoofogia, e pei o le faamaloloina o ē mama‘i ma toe faatutūina i latou na maliliu, o se faaataga o mea silisili o le a ia toe faia mo le lalolagi i se lumanai lata mai.

Na iai foi lomiga fou na tatalaina ai foi i lenei faatasiga; o le polosiua “Ia Toe Fo‘i iā Ieova” ua saunia faapitoa lava mo le toe faamalosiau i sui o le ekalesia atonu ua tau faavaivai ma toe pa‘ū atu i le lalolagi a Satani, ae o loo maua pea le avanoa e toe foi mai ai ma faia se leleiga ma Ieova le Atua.

O le tusi, “IESU – Le Ala, Le Upu Moni ma le Ola” o se auiliiliga o le soifuaga atoa ma le faiva a Iesu i le lalolagi, ma ona aafiaga lelei i soo se tagata. Faatasi ai ma le DVD o le vitio ua faaulutalaina i le gagana Samoa: “O le ā le Alofa Moni”.

O se ata e mautinoa o le a aogā mo talavou ma soo se tasi o faia se filifiliga mo se paaga faaipoipo, ina ia taulau manuia ma fiafia o latou olaga faaleaiga.

Ina ua faaiuina le polokalame atoa mo le tolu aso a le ekalesia, na faaleoina le agaga fiafia ma le faafetai o sui taitasi sa auai, o uō ma ē fiafia sa auai atu, mo le ‘oa o lenei lao‘ai faaleagaga sa talisua ai ma le olioli i latou uma na talia le valaau ina ia ‘Faaa‘oa‘o ia Iesu’.