Tauaofia le fonotele ale Samoan AOG Ausetalia 2017

Taitai aoao ma sui ole Komiti Samoan AOG ile po ole Aso Faraile na tatalaina ai le fonotele i Kuiniselani, lona lua ma le tolu mai le itu taumatau: Ps Asafo ma Helen Avia ekalesia Hosanna e ona le malu sa faaaogāina
Taitai aoao ma sui ole Komiti Samoan AOG ile po ole Aso Faraile na tatalaina ai le fonotele i Kuiniselani, lona lua ma le tolu mai le itu taumatau: Ps Asafo ma Helen Avia ekalesia Hosanna e ona le malu sa faaaogāina

Ole tau gaga ifo ole la i lona tauafiafi ile Aso Faraile aso 10 o Novema na tatalaina ai loa faitotoa ole malumalu ale ekalesia Hosanna Brisbane Church ile aai o Forest Lake Kuiniselani, lea na  tatalaina aloaia ai le fonotele ale Ekalesia Samoan Assemblies of God.  Na tauaofia uma mai ai le au usufono tele e aofia ai sui ole komiti ma tagata lotu mai Sini, Melepone, Perth, New Castle ma isi setete ile i lana fonotele faaletausaga.

 Ole ‘afa ole lima na mataina ai le lealea ma le sisiina a’e o tagavai e lima, e le gata ole malo o  Ausetalia, malo o Samoa, faapea tagavai a le Setete o Vitoria, Setete o Niu Sa Uelese ma le Setete o Kuiniselani. Na manino le maimoa ma le  silasila ale toatele o au usufono uma sa auai ao lagiina pese faafeiloai, faatinoina pese faitaga ma viiga ole Atua, faapea siufofoga malie  ole Team sa tu ile foe i pesega faifai pea, na atili mamalu ai le sauniga.

Ose tasi vaega tāua tele ona ole fia faafofoga lea ole aofia ile feau faalaeiau ole fonotaga ma aua foi ni oso o lenei fonotele, lea na malaga mai ai lana auauna.  O ia ole failauga faapitoa mai le matagaluega a Amerika ile ekalesia Samoan AOG, le susuga ia Ps Tuugasala & faletua ia Julie Fuga.  Ole Aso Toonai ole isi lea aso tāua, auād na faia ai  le fonotaga ma le palota o suiga tofi ae sa folafolaina ai foi le upu a le Atua ele failauga faapitoa. Na faagasolo polokalame uma ma le taumafaga tele, faaiuina i talanoaga ma faamasaniga e pei ona iai le fanau ole faatuatua.

Ole toe aso nai moamoa, ole Aso Sa lea, sa amata le sauniga ile 9 ile taeao, na tufi taufao ai foi faalumaga faalelagi ao tuufaatasia ai ekalesia e 11 a Kuiniselani ma au usufono mai setete eseese. Ole feagai ai foi ma sauniga ole Aso Sa, na faapea ona faauuina ai tofi e pei  ona palotaina  mai le Aso Toonai.

Na lulu aao ma faatofa ma taape ai le fuamanusina ina ua mae’a sauniga ma le taumafataga ile Aso Sa. E le taumate le mautufaaga o usugafono i oso faalelagi ua taliu atu ma latou i fanua ma alalafaga ua aumau ai, ua sili atu foi lenei tausaga nai lo le tausaga ua tuanai. Ole a usuia  le isi fonotele ale ekalesia  i Sini Niu Sa Uelese ile  tausaga e 2019.

O tofi nei o sui ole Komiti Assemblies of God Ausetalia:

Ua toe tulai mai le Taitai aoao Samoan Assemblies of GOD a Ausetalia – Ps Kiki & faletua ia Lovine Taulapapa (Sini)

Sui taitai – Ps Onesemo & faletua ia Puao Pulepule (Melepone)

Failautusi – Komisi & faletua ia Motootua Lealamisa (Sini)

Teutupe – Enele & faletua ia Mesepa Tailiki (Melepone)

Sui ole komiti e toatolu – Ps Aperaamo & faletua ia Selepa Nanai (Sini); Ps Tito & faletua ia Tala Fepulea’i (Sini) faapea le susuga ia Ps Manuula & faletua ia Foloi Nai (Perisipeni)

Suiga tofi ole Aoga Aso Sa

Taitai Aoga Aso Sa – Ps Fofoga Tupa’i (Syd)

Sui taitai – Ps Esau Tofaeono (New Castle)

Failautusi – Ps Iakopo Lesui (Syd)

Teutupe – Ps Saupō Fainifo mai Sini