“E aveese mai lo outou mativa i outou aao, ae iai se isi mea fou e tupu mai ai, ua faamativaina lou aiga, ae faatamaoaigaina ai nisi ua mafatia, e lē uma le alofa o le Atua”, o nisi ia o saunoaga faalaeiau a le susuga i le Toeaina Tumama Vili, o le Pulega motu i Saute i le sauniga lotu i le malumalu EFKS i Kalaiesetete, e faafetaia ai le soifua faitaulaga o le Pulega e tusa ma le foai ua ofoina mo le Ekalesia Samoa i le faiga Me o lenei tausaga.
O le afiafi o le Aso Faraile 26.11.2010, na malotia ai laufanua o le Ekalesia EFKS i Kalaiesetete auā le tauaofiaga a le Pulega mo le latou faiga taulaga lea e amata mai Invercargill ma faasolo i Nelson. E iva le aofai o aulotu sa fuifui faatasi ai mo lea faamoemoe.
Na uluai amata i fonotaga i le tofiga a faifeau ma a‘oa‘o, ae o le taeao o le Aso Toonai sa faataunuuina ai le tofiga tele e tusa ai ma fonotaga masani a le ekalesia.
Sa faatumulia le aai i le faimalaga mai o nai aulotu taitasi e ui i le vava mamao o nofoaga. Ina ua mae‘a le tofiga tele, ona alo atu lea i faafiafiaga matagofie a tupulaga talavou mae‘a tapena mai aulotu eseese. Matagofie le alofa faasafua o le Atua i le tuputupu a‘e o tupulaga lalovaoa o le ekalesia.
O le taeao o le Aso Sa na matuā faatumulia le malumalu i le sauniga lotu, e lē gata i le felanulanuai o le matagofie o togiga a aufaipese ae o malo asiasi sa faatasia ai i le molimauina o lenei faamoemoe tāua e tasi i le tausaga.
O le susuga lava i le Toeaina ia Tumama Vili sa taitaia le sauniga. Sa faapea foi ona manatua ai ma le loto filemu le faalavelave e pei ona aveesea faafuasei ai soifua o le toa luasefuluiva i le Pike River Maina i Greymouth.
O le susuga i le misionare, Menu Puni mai Blenheim sa saunia le tatalo faatasi ai ma le lauga faapitoa o le sauniga sa fofogaina e le faafeagaiga Reupena Muaimalae (Hoon Hay), na ia faaautuina lana lauga i le ola ua faaolioliina e le Tala Lelei, e lē lagona se tiga auā ua faafiafiaina ma galue pea ma le loto onosai.
Na tolaulauina le taulaga aofai a aulotu taitasi e ala i soo se foai ma mautinoa ai le alofa sasaa mai o le Atua i lana fanau. E lē uma le alofa ua faaalia i le taulaga sa sasaoina ma ofoina faatasi mo Ia, ma faafetaia ai le Atua e tusa ma lona tamaoaiga.
O le sakarameta o le faamanatuga sa saunia ma o susuga i tiakono fou ua tulai mai na tufatufaina.
E mālie eseese le saunia o pese ma viiga, o le pa‘ō o nota suifefiloi, aemaise o fuataimi i alii ma tamaitai, ae ua sili ai le sasao o le fuataimi a le faletua o Filifilia Puni (Blenheim), i lona taumafai i lana aulotu Kanana Fou.
O le aufaipese mai Ashburton na saunoa le Toeaina ua tatau ona sili ona o nai fanauiti, ae na sola le aufaipese EFKS Shirley lea o loo taitaia e Rev Patini Waterhouse ma le manumalo o le togiga. Na matagofie le lulaina o laei, ae faafetaia foi aufaipese uma auā e leai lava se togiga e faaletonu.
Na mapu atu le pulega faatasi ma malo asiasi i le hall mo le toonai tele, ma o aso uma e tolu e lei itiiti le faasoa a le Atua i nai aulotu uma i totonu o Kalaiesetete auā le taliina o le Pulega.
Pau lea ia faapaiaina le taulaga e ala i soo se foai faatasi ma o tatou tagata ua ofo atu ia Viia ai Lona Suafa.
