Ua tuta le sa ole Aukilani Samoa mo lenei tausaga 2017 i ana taamilosaga lakapi taitoa 15 faapea le taitoa 7. Ole afiafi ole Aso Toonai na se’i mavae nei, aso 11 o Novema 2017, na faatautaia ai le tufaga faailoga ale Aukilani Samoa e aloaia ai tama taaalo ma faafetaia ai lo latou finafinau i lenei tausaga.
Ole faatautaiga ole taamilosaga ale Aukilani Samoa i lenei tausaga, sa viia e le vasega o laufali papalagi sa o latou faafoeina taaloga. Na taua e se tasi o sui laufali ua 17 tausaga talu ona ia galue faatasi ma le Aukilani Samoa i lenei taamilosaga le susuga ia Paul Van-Etten, “Ole tausaga pito i sili lenei ona lelei ‘au taaalo, pe a fua i tausaga e tele ua mavae na avea ai ‘au ma laufali i lenei taamilosaga. Ole vaega muamua na ou vaaia le tele o suiga ua agai iai le faamuamua a faiaoga ma tama taaalo, ole amio pulea ma le taaalo ile agaga o taaloga ma tulafono.”
“Ole taamilosaga lenei, e le o iai sona tāua tele ia Niu Sila ma le atinaega o ‘au a Niu Sila, peitai e matuai tele lona taua i le ‘au a Samoa faapea tama taaalo i le sailia lea o ni kalapu e taaalo ai i fafo. I la’u vaai i lenei tausaga ua tatau ona vaavaai le Aukilani Samoa e talosagaina le komiti oloo filifilia ‘au a Samoa (selectors) e silasila i lenei taamilosaga ile tausaga fou.”
Na ta’ua e le tasi sui laufali papalagi foi ia Peter Willis “Ole tausaga lenei ua ou vaai ai ua fai si vave ole faatinoga ole taaloga e fua i le saoasaoa oloo faagasolo ai taamilosaga ma le laasaga o ‘au oloo taaalo ile (Premium). E toatele foi i latou e tele le avanoa e maua ai a latou kalapu e taaalo ai i fafo, ose itu e ao ona silasila iai le Aukilani Samoa e unaia iai tama taaalo mai le Aukilani Samoa.”
Ole taamilosaga taitoa 15 ma le taitoa 7 i lenei tausaga ua manumalo aoao ai Laulii i ipu autu. Ole Laumua o Tumua mai Afega ua 22 tausaga talu ona ofi mai totonu ole taamilosaga ale Aukilani Samoa, ae ose taimi muamua lenei ua ia ausia ai le tulaga maualuga o lona sailia lea ole siamupini o ipu autu ile taitoa 15 faapea le taitoa 7.
Ole saunoaga ale peresetene ole Aukilani Samoa, Aiolupotea John Roach na ia viia ai ‘au uma na tausinio i lenei tausaga. “Ole tausaga muamua lenei ua vaaia ai le tau fai finau uma o ‘au ile siamupini, pei o ‘au ia sa o la sailia le tu 6 ma le 7 i tausaga ua mavae ae o lea ua saili siamupini i lenei tausaga.”
Na ia taua foi i lana saunoaga fuafuaga mamao ale Aukilani Samoa mo Aukuso ile 2018. “Ole tausaga fou, o lea ua faamautu ‘au e 12 ole a tausinio ile taitoa 15, o isi ‘au sa tausinio i lenei tausaga olea ua pa’u ese ma le taamilosaga.”
“Ole tausaga fou foi, ole a faagasolo ai le taamilosaga a ‘au i lalo ole 20 tausaga, faatasi ma le taamilosaga mo au i lalo ole 13 tausaga.”
Ina ua tulitatao le finagalo ole peresetene i le taamilosaga i lalo ole 20 tausaga ma lona mafuaaga ua silasila ai le Aukilani Samoa e unai lea faamoemoe, na ia faailoa mai ai, “Ole tausaga lenei, na mafua ona vave ma lelei lenei taamilosaga ona ole toatele o tupulaga laiti e i lalo ole 30 tausaga na taaalo, e le toatele nisi i luga ole 35 tausaga. Ole agaga lea ole Aukilani Samoa, ona ua toatele tama fanau a Samoa, e le maua loa so latou avanoa ile ‘autele a Aukilani, le lavea ile lisi faatalitali ale Auckland B, ona faavaivaia loa lea, peitai olea ole a toe tapu’e atu ele Aukilani Samoa ma sue ni o latou lumanai i kalapu i fafo ma toe faamalosia e toe finau ise isi laasaga maualuga atu.”
Faailoga faapitoa
I lea afiafi na tufatufa aloaia atu ai loa faailoga ia i latou ua lautogia mo lenei tausaga ia latou taumafaiga. Ole tama talavou taalo o lenei tausaga na maua e Sanele William, mai le Laumua o Tumua. Ole ‘au na manumalo i le togiga na maua lea e le ‘au a Iva. Ole aulakapi silisili lona alualu i luma i lenei tausaga na maua lea e le Laumua o Tumua.
Ole kapeteni ole tausaga na maua lea e Tapuai I’a Popoa o Laulii, faapea le latou faiaoga ia Laufili Apineru Tavita sa ia maua le faailoga ole faiaoga sili ona lelei le faatulagaina o lana ‘au.
Ole tama taalo ole taitoafitu na maua lea e Desma Liaina o Laulii, tama taalo ole tausaga na maua lea e Jeremiah Faaumuumu Laumua, ae na toe taualuga foi le afiafi e Tuisamau ile avea ai o Laulii ma ‘au siamupini ole tausaga atoa. (Team of the year).
