Tauaao e le Mafutaga a Satapuala le $80,226.85

Mafutaga a Satapuala.
Mafutaga a Satapuala.

Na iai le aao taitai o le Atua e tusa ai ma le faamanuiaina o le tusigaigoa a le alalafaga o Satapuala i le Aso Toonai ua mavae atu nei, sa feagai ai le mafutaga, i alo ma tamafanau, paolo foi ma gafa e malu ai le alalafaga i Kuiniselani.

Na faatumulia le Tiafau hall, a le susuga i le Toeaina ia Rev Tauaaga & faletua ia Senerita Mataafa ma le ekalesia EFKS Soutwest Brisbane i le faamoemoe o Satapuala.

O le auga o aute o lea faamoemoe, o se sailiga seleni auā le fia fausia o le malumalu tapuai o le Atua ae lē gata i lea o le maota o le galuega EFKS i Satapuala sa faapea ona faatama‘ia e le afi.

O se faamoemoe sa molimauina ai le mamalu silisili ese o le Atua e ala i le alofa tulai ma le aao mafola o tauaiga, uo ma ē masani aemaise o le mafutaga a Satapuala. Na o latou tauaaoina se tino tupe e $80,226.85 ona o le alofa tulai o Samoa na potopoto aemaise le ekalesia EFKS Southwest, tauaiga, uo ma ē masani.

O le fofoga o le Aso o le tofa ia Iliolemalae Apulu Asivao Kilipati. Na faatino foi le valevalealofa o le mafutaga auā se inati o le auvalaaulia ae tainane o le aufaigaluga a le Atua.

O le Tofa ia Patea Vaili Neemia o le Sui o le aumalaga mai Samoa na ia molimoliina se agaga faafetai e tusa o le maau ma le aao mafola o le atunuu. Na tali fuaitau le tofa Mati Muaava Togia e fai ma sui o le ekalesia ona o faaaloaloga maualuga.

E viia le Atua ua iu manuia mea uma e lē gata o taumafaiga a le Mafutaga aemaise le tapuaiga a le susuga i le Toeaina ia Rev Ailepata & Nofoaga Leutama ma le ekalesia EFKS i Satapuala.