E lē o toe po se lilo ile silasila ale atunuu ile tulaga maualuga ua siitia ai nei le tulaga o taaloga i alo ma tamafanau o Samoa i lenei faaagatama ole lakapi, ile Aukilani Samoa.
Ua avea ose faaeaea i aiga ma mātua ona o lea oloo avea lenei Iuni Lakapi ale atunuu i Aukilani ma auala poo se faitotoa e ono silasila mai ai le Iuni lakapi a Niu Sila faapea ma Samoa e ono piki atu ai ni tamafanau a Samoa mo le Olopeleki a Niu Sila aemaise ai foi ole ‘au ale atunuu le tatou Manu Samoa. Aemaise ai ole faailoaina lea ma le fafagu i fanau tama ma teine Samoa le taleni ma le meaalofa oloo iai latou e ono manuia ai aiga nuu ma ekalesia.
Ole tausaga ua mavae na faamanatuina ai le atoaga ole 20 tausaga talu ona faavae mai le Aukilani Samoa i totonu o Aukilani, ma o nei tausaga uma e faia ai lava a latou tufaga faailoga ile faaiuga ole tausaga e fiafia ai ma faauma ai taaloga o lea tausaga ma lea tausaga.
Ae ose suiga ese ma se sitepu fou ua laasia i lenei tausaga e faauma ai taaloga ale Aukilani Samoa, ona ua mafai ona ausia ma faia se tufatufaga faailoga faapitoa mo ‘au taitasi sa auai ile taamilosaga, ma ua valaaulia uma ai kamupani sa lagolagoina le Aukilani Samoa aemaise o aiga ma uo ae faapea foi ile asosi a laufali sa latou faatautaia mai taaloga ile taamilosaga atoa.
Ma ose sitepu fou lea ua laalaa agai iai le Aukilani Samoa, ma ua maitauina ai se suiga tele ua iai taumafaiga ale komiti faafoe oloo faatautaia lea Iuni. Ole po ole Aso Toonai 19 o Novema na faataunuuina ai lea faamoemoe ile Maota o Samoa i Magele, na iloga ona faatumulia lea afiafi i sponsors taitasi aemaise o uo ma aiga.
Ole tofa ia Seumanu Francis Ioane na fai ma fofoga ole po e faafeiloai ma faatulima ile mamalu ole auvalaaulia, ona saunoa lea ole Peresetene ale Aukilani Samoa le afioga ia Aiolupotea John Roache e faailoa le tulaga maualuga ma le manulauti oloo taumafai agai iai le komiti ale Aukilani Samoa, na faamanino foi ele peresetene nisi o alo ma fanau o Samoa lea ua ofi atu ile Olopeleki na amata atu ile Aukilani Samoa e pei ole alii o Charlie Faumuina, a‘o nisi foi lea ua ofi atu ile ‘au ale atunuu le Manu Samoa 15 faatasi ai ma le taitoafitu.
Sa faapea foi ona momoli lana faafetai i ‘au taitasi sa auai ile taamilosaga i lenei tausaga faatasi ai ma le asosi laufali. Na maua foi le avanoa e saunoa ai le afioga ile Konesula ia Faolotoi Reupena Pogi e faaleo ai lona agaga fiafia ma le faafetai ile afioga ile peresetene ma le laulau e tusa ai ma le faafoeina ole Aukilani Samoa e ala lea ile tapueina ole taleni ma le meaalofa oloo i fanau.
Ole susuga ia Shiu Singh ole pule ole Henderson Cars, o ia lea oloo lagolago malosi ile Aukilani Samoa na saunoa faafetai ile amanaiaina o lana tautua e tagata Samoa aemaise lava i uo ma ana paaga.
Vaega 1 ole Tufaga Faailoga
Rookie Player of the Year (Sponsored by Katma Painters)
Faafouina Loau (Marist Old Boys)
Team Display Best Tournament Spirit (Sponsored by Magic Money)
Mountfort Brothers
Most Improved Team (Sponsored by NZTS)
Laumua o Tumua
Forward Player of the Year (Sponsored by Avei Family)
Jeremiah Fatialofa (Saleimoa)
Back Player of the Year (Sponsored by House of Deco)
Tulolo Tulolo (Marist Old Boys)
Captain of the Year (Sponsored by Marist Old Boys Association)
Lene Lene (Saleimoa)
Delegate of the Year (Sponsored by Roache Motors)
– Faafetai Leota (Marist Old Boys)
Coach of the Year (Sponsored by ACC NZ) – Fomai Fili (Apia Maroons)
Sevens Player of the Year (Sponsored by Roache Family)
– Tulolo Tulolo (Marist Old Boys)
Team of the Year (Sponsored by Digicel)
Apia Maroons
Auckland Samoa Representative Player of the Year (Sponsored by Henderson Cars)
Administrator of the Year (Sponsored by Oceania Communication 2000)
Tuifaasisina Moe Mata‘afa
Best and Fairest Player of the Year (Sponsored by Hernderson Cars)
Filo Lepou (Marist Old Boys)
O nisi o faailoga faapitoa sa tufatufaina oni faailoga faapitoa mo i latou ile ‘au a tamaitai e pei ona iai le:
Women’s Senior Player of the Year – Seiuli Fiaoo Faamausili
Most Promising Player – Aotearoa Matau
Women’s Junior Player of the Year – Lauryn Steed
Ma faailoga sa tauaaoina lea i nisi o tamalii sa iloga lo latou fesoasoani malosi ile Aukilani Samoa e pei ole susuga ia Tapuai Siaosi, Tupai Pati faapea le susuga i Shiu Singh.
Na taualuga le faamomoe i lea po i faafiafiaga matagofie ale La o Samoa Dance Group faatasi ai ma le saunoaga mulimuli ale afioga ile Peresetene ia Aiolupotea John Roache na momoli ai lona agaga faafetai ile atunuu aemaise ole Konesula o Samoa ile auai i lenei faamoemoe ae faapea foi i lana faafetai faapitoa i kamupani taitasi ile lagolagoina ole Aukilani Samoa i lenei tausaga aemaise o lana tufaga faailoga.
