O pesega ma loimata o le fiafia na faaalia ai le faaea aiga ma le siitia o mātua i se vaega o taumafaiga a fanau. Sa leai se tasi o aiga o le tamaitai ia Angelsina Setu faapea ana uo e lei auai i le ‘aiga fiafia ina ua faamanuiaina lona taumafai e pei ona alo i ai, lea sa matuā faatumulia ai le hall a le iuni lakapi a Otahuhu i le po o le Aso Faraile ua mavae 8 o Aukuso.
Na lē mafai ona malaga mai lona tina i Samoa ona o gasegase o le tino ae na o si ona tuaa ia Rev Petaia Setu na auai e molimau lona taumafai. Sa faapea foi ona faatasi atu ai nisi o faafeagaiga ma sui o ekalesia o le Metotisi Fou a le Atua i lea afiafi aemaise o ona tauaiga uma.
O Dr Julliet Nanai, o se tasi o alo o le atunuu o loo fesoasoani i tamaiti aoga o le Pasefika i totonu o le aoga sa faapea foi ona auai faatasi ai ma le alii o Junior Samuela o loo galue ai foi i totonu o le Univesite i North Shore.
O lana faifeau ia Fatu Manu sa taitaia le polokalame o lea po i le sauniga lotu. Sa iai foi faafiafiaga na saunia e nisi o ona aiga faapea ekalesia o le fale tolu a le Metotisi Fou a le Atua. Na solosolo lelei talanoaga o le po i musika faagauloto a le susuga ia Seumanu Francis Ioane ma le leo lasi o le alii o Vaniah Toloa.
Na taualuga faafiafiaga o le po i le ausiva lauiloa a le Tatau Dance Group. O le Continental Catering na latou tapenaina le taumafataga. Sa tatala foi le pa mo i latou e taumafa ‘ava ma le vai inu. O le susuga ia Iumai Lavea sa fai ma sui o le auvalaaulia e momoli se meaalofa mai le ekalesia mo le tamaitai faauu. O le fofoga o le po o le susuga ia Aosane Faaoso.
O Angelsina Setu o le lona tolu lea o le fanau a le susuga i le faafeagaiga ia Rev Setu ma le faletua ia Faleupolu. Na amata lona olaga aoaoina i le tulagalua a Malifa i le Yr 1 ma le Yr 2, ona toe faaauau lea o lana aoga i le tulagalua a Samauga ina ua siitia ona mātua ma faifeau i le Itu o Tane.
Sa toe see mai i le tulagalua a Iva ma ave ai le Yr 4 ma faaiuina ai loa lana Yr 8, ina ua toe siitia ona mātua i Salelavalu ma galulue ai foi i le galuega a le Atua. 2002 i le 2003 na faaiuina ai loa lona taumafai ma alu i le kolisi o Samoa. O le tausaga lava lea sa malaga mai ai loa i Niu Sila ma toe faaauauina ai ana aoga i le kolisi o Waitakere.
Sa faapea foi ona aoga i McAuley High School ina ua siitia mai foi ona mātua i Otahuhu. O le 2008 na aoga ai i le Iunivesite a Aukilani i le polokalame e ta‘ua o le Tertiary Foundation Certificate.
O le 2010 na ia umia ai se Certificate of Health Care Support. 2011 na amata ai loa ona ia sueina le Bechelor of Health Science Occupation Therapy seia oo ina faamanuiaina lona taumafai.
Na ta‘ua e le tamaitai ia Angelsina e tele fita ma faigata o lana aoga ae sa tuu atoa i ai lona malosi ma lona mafaufau atoa, ina ia iai sana meaalofa e faafiafia ai si ona tina a o feagai ma ma‘i o le tino aemaise lona tamā o loo nafa ma le taitaiina o le galuega a le Atua.
Na momoli foi lana faafetai i ona tauaiga uma, o lana ekalesia aemaise o ona mātua i le nofo tapuai ma le tatalo a o iai i ana aoaoga.
