Tauaao aloaia le pine a le Tupu Tamaitai mo Aufaga Faimai Pisu-Tuimauga

“O le fua e te lūlū e te toe selesele… E mulimuli mai le taui o au galuega lelei. O le galue punoua‘i ma le lē faalogologo tiga, e mulimuli mai lona taui mai le Alii”

O le faletua ia Faimai Tuimauga ua ia mauaina le pine taualoa mai le Tupu Tamaitai ua faaigoaina o le Oueen’s Service Medal. O le Aso Lua, aso 19 o Aukuso na faia ai se sauniga puupuu i le Government House i le aai o Aukilani, e faaaloaia ai le tauaaoina atu o lenei pine poo se faailoga taualoa mo le faletua ia Faimai.

E na o le toalua Samoa na la mauaina lenei faamanuiaga, o le faletua ia Faimai ma se tasi o tina e ‘afa Samoa o loo galue o se puleaoga i le Sylvia Park Primary School. O se tasi foi o ana uo mamae sa la galulue faatasi i Mangere Center; o se Farani lona tina ae o le Faleasiu lona tamā.

O le afiafi lava o lea aso na faatinoina ai se taumafataga tele i le faletalimalo o le Holiday Inn i Magele, e patipatia ai le faailoga ua tauaaoina e le faletua ia Faimai. Na auai ai o la aiga, o uo faapea o la mātua faaleagaga, le susuga ia Ata Milo ma le faletua ia Mouaana Milo. Sa faatasi atu foi i ai le faletua malolo manumalo ia Mele Autagavaia. Na amata lava i le tatalo na saunia e le susuga i le faafeagaiga ia Ata ona sosoo ai lea ma le taumafataga.

Sa faafofoga foi i le molimau matagofie a le tamā o le aiga ia Toleafoa Tuimauga e tusa ai ma le faailoga ua maua e si ana tautoga; na momoli foi le faafetai a le faletua ia Faimai i ona aiga ma aiga o le tamā aemaise o le tapuaiga a le susuga i le faafeagaiga ma le faletua faapea le faletua malolo manumalo ia Mele ua mafua ai lenei mafutaga. Sa faapea ona momoli foi ni meaalofa tupe mo le auauna a le Atua ma le mamalu o le auvalaaulia na auai atu ma molimau lenei faamoemoe tāua.

Ae na ta‘ua e le faletua ia Faimai, na ia maua le tusi mai le malo e ta‘u mai ai ia te ia ua faamanuiaina lona soifua galue i se pine, ae sa ia lē talitonu auā sa ia lei mafaufauina e maua se taui o mea o loo ia galue ai; ma sa ia nanāina le tusi i lona toalua ma si ana fanau ona o lona talitonuga e lē tatau ona ia maua lenei faailoga.
Ae ina ua ia maua le tusi mai le afioga i le Palemia ia John Key ma le tusi mai le Minisita o Aoga ma taitai o pati taitasi e faamanuia ma faafetai mai ai i ana galuega lelei o loo faia i totonu o aoga a le atunuu, o iina na ia faatoa tuuina ai loa le tusi i lona toalua ma lana fanau e faailoa i ai le faailoga ua tuuina mai foi e le Tupu Tamaitai ia te ia. O lona lagona faafetai i le Atua ona o le malosi ma le mafaufau lelei ua foai ua mafua ai le faaeaina o ia ma lona aiga.
O le pine lenei ua maua e le tina ia Faimai o le Queen’s Service Medal, e seāseā maua e se tasi ae na saunoa le tina e oo mai i le taimi nei na te lē iloa poo ai na faauluina o ia, ae o le tele o ana galuega ma le tele o ana polokeki mai le ofisa o aoga, i mea tau aoaoga aemaise o tamaiti o le Pasefika ina ia agai i luga le latou taumafai, o iina na mafua ai ona maua lenei faamanuiaga, auā e faaulu mai oe e isi tagata.
O le isi itu tāua, o le tele o ana galuega na aumai e le malo e faatino ua uma ona fai, ae toe galue atu isi galuega ona o lona naunau ia lelei fanau. E galue fua mo isi aoga e aunoa ma le totogi, faatasi ai ma lona fesoasoani i mātua i le unaia e ave ni a latou mataupu ina ia faaaogā ai le iloa ua latou maua.
O le talitonuga o Faimai, o le lava tapena o fanau mai lalo i Aoga Amata, e oo atu foi i luga i isi aoga ua lava saunia latou i aoaoga, ma e faafaigofie ai foi galuega a faiaoga. Ua molimau foi le faaaogāina o isi tina i totonu o isi Aoga Amata ona e taumafai malosi lava e unaia e o e ave ni a latou mataupu.
Na ia faia foi se tasi o mataupu tau i le Gagana Samoa, e taumafai e koleni ai tamaiti ina ia lelei a latou taumafaiga i totonu o aoga, aemaise o mātua ia faamalosia lava i latou i mea tau le aoaoga. O tina o loo momoliina a latou fanau i le aoga ma tina e fetaui i ai, o loo lui pea e le faletua ia Faimai e mafai ona latou faia mea ia o loo ia faatinoina, aemaise o le telē o le sao o le leitio Samoa i ana polokalame o loo momoli ai lenei fesoasoani i mātua ma fanau.
Ua tasi se tina Samoa na amata mai i lenei mataupu ma o lona tausaga mulimuli lenei i le AUT. E telē se galuega o loo galue ai nei lenei tina mo le atunuu, e le gata mo fanau ae mo mātua foi.
O loo iai foi lana polokeki o loo galue ai i le taimi nei, o le galulue lea ma Aoga Amata ina ia lelei le tapenaga ma latou polokalame ina ia alu atu le tamaitiiti i totonu o aoga ua lava saunia. Ua amata foi ona alu e galue i totonu o Ekalesia, ona e mafaufau atu a lelei ona fai aoga i totonu o Aoga Aso Sa ma totonu o Ekalesia, o le tele foi lea o le lelei o tamaiti.
Faletua ia Faimai Tuimauga i le taimi o lana faafetai i le tapuaiga a lona aiga ma ona mātua faaleagaga

Susuga i le faafeagaiga ia Ata Milo ma le faletua ia Mouaana, faletua malolo manumalo ia Mele Autagavaia ma aiga sa auai

Faletua ia Faimai o loo laei lana pine taualoa, ma lona alii ia Toleafoa Tuimauga ma o la alo