Tāua tele mafutaga a tupulaga talavou i totonu o Ekalesia

Tala o le maliu o Iesu Autalavou Kelesetone
Tala o le maliu o Iesu Autalavou Kelesetone

E 11 ekalesia na auai i le tuufaatasiga a autalavou a le Sinoti a Aukilani i Matu lea sa faataunuuina i le malumalu a le Ekalesia Metotisi i Aukilani i Grey Lynn i le aoauli o le Aso Faraile o le Eseta.

O lea mafutaga o se polokalame na fuafuaina e le afioga i le Sea ma le mamalu o susuga i faafeagaiga ma le pule autalavou ina ia maua se avanoa e mafuta ai tupulaga talavou a le Ekalesia Metotisi Samoa.

Ua pa‘ū tonu lea faamoemoe i le Aso Maliu ina ia toe manatu ai tagata uma i le maliu o Iesu faatasi ai ma le mafuta faatasi o fanau a le Ekalesia o loo galulue i soo se aulotu o le sinoti.

O le aso na toe lalaga ai le toto masaa o le faaola ina ua molimau faaevagelia ma tala faatino a autalavou taitasi e faamanatu ai, o tatou na maliu ai Iesu, ae lē gata i lea o le upu faamalosi na saunoa i ai le tamā o le Sinoti le afioga le Sea ia Oianatai Matale, e faapea, o le Aso Faraile, le Aso Maliu, na faataunuu ai e Iesu le finagalo o le tagata e ala lea i lona maliu, ae o le Aso Sa o le Toetu o le aso lea e faia ai le finagalo o le Atua e toe soifua manumalo mai ai le Alii Faaola.

Ekalesia Metotisi Panmure tala i le maliu o Iesu
Ekalesia Metotisi Panmure tala i le maliu o Iesu

O se molimau ola na fafagu ai pea i tagata uma sa auai, le faaolataga, ua lē gata i mātua ae na oo lava i fanau sa faaautu i ai lenei faamoemoe. O nisi o autalavou sa taulamua ai a latou faifeau ma o latou faletua i le faatinoina o polokalame ma o se faataitaiga lelei lea sa fai ma avefeau mo tupulaga talavou o loo i totonu o autalavou.

O le polokalame na tatala i le faaevagelia a le autalavou mai Measiana ae taualuga e le autalavou mai Onehunga. O le susuga i le faafeagaiga ia Rev Tapu Malo sa fai ma fofoga o le aso. O lenei faamoemoe e faia lava i tausaga taitasi ina ia mafuta ai tupulaga talavou i taimi lava faapenei. Na faaiu lea afiafi i le iputi na saunia e autalavou taitasi ma tatala ai loa le fili alii.