Ua toatele le mamalu o Samoa ua aumau ma alaala i fafo aemaise lava Niu Sila o loo toatele ai. O le autū o le tuua o le atunuu o le fia saili manuia auaiga i Samoa.
Ua avea sailiga manuia i atunuu i fafo ua uluola ai nisi aiga ma ua fananau le toatele i fafo ma ua faasolo ina matutua ae e lei malaga mai lava i Samoa se’i silasila fanau ma fanau a a latou fanau i le atunuu sa soifua a’e o latou tupuaga poo mātua.
E lē tau fesiligia o le mafuaaga lea o le faia o faatasiga a aiga poo reunion e pei ona malaga mai ai i Samoa ona o le taumafai e toe faailoa i fanau na ola a’e i fafo, aiga i Samoa.
E lata i le tolu vaiaso na asiasi mai ai i Samoa se tasi o tamaitai o Peka Tuuina Vulu ma lona aiga. I lana faamatalaga o se tafaoga ua avanoa ai ona toe asiasi mai i le atunuu pele sa fanau ma ola a’e ai, a o lei tuua le atunuu i le silia i le lua sefulu tausaga ua mavae. “E maofa lava i suiga televavave ua iai le olaga i Samoa ma e taua tele le nonofo i fafo ae fai ma asiasi mai i le atunuu ma feiloai ma aiga”.
O le faamatalaga a Peka ua mau paolo i se alii Tokelau le susuga Paulo Vulu, ua ese lana vaai i le soifuaga o tagata i Samoa i nei aso. Fai mai ua tele taumafa ma ua ese foi sikaili o lavalava ua vaaia ua faaaogāina auā o aso a o lei malaga ese ma Samoa, o le toatele lava e faaaogā ie solosolo ma nai mitiafu pe a malaga i le taulaga i Apia i feau ma faatauga, a o aso nei ua ofu vae pupuu ma ofu vae uumi, alii ma tamaitai ae ua lasi foi le anoano o sikaili o lavalava ua oofu ai tagata mai lava i le au matutua e oo i fanau.
O vaaiga i le taulaga i fale ma alatetele ua matuā telē lava le suiga e pei ona molimau lea alo tamaitai o le atunuu. “O traffic lights sa leai i la aso auā o se alii leoleo lava e faasinoina feoaiga a taavale, ae o nei aso sole e matautia molī auala ua pei lava o Niu Sila ma la atunuu tetele”.
Fai mai le tamaitai o aso ma tausaga ua tuanai a o aoga i se tasi o Kolisi i Apia e tele ina savavali tama ma teine poo le ā lava le mamao, ae vaganā tamaiti sa feololo seleni a o latou mātua sa malaga i pasi.
O aso nei e pei o lana molimau ua tutumu pasi i fanau a’oga, ua fai taavale a aiga ma ua tumutumu i faleaoga pe a tuua e piki mai fanau. Na malaga i Savaii le aumalaga ma maimoa ai i le motu atoa ma o le molimau a le aumalaga, sa toe mananao e faaopoopo nisi aso peitai ona o le puupuu o le taimi na toe malaga mai ai i Upolu.
O le faletalimalo o le Vacation Beach Fales i Manase sa faamautu ai Peka ma lona aiga, ma e ese foi le lagona i le toe ulufale i se fale Samoa atolau ae tatau le ta’inamu e momoe ai. “
O le fiafia ia o le aumalaga auā faato’ā latou tofi lea i le soifuaga faasamoa o le tuu i lalo o pola ma sisi i luga, oso ane i le faleaiga o le faletalimalo e felesi fualaau ‘aina suamalie e maua mai i laufanua o le atunuu”.
O le miti a le aumalaga e toe fia tafafao i Samoa i se aso. “Ua manaia Samoa i le vaai, ua manaia foi suiga lelei ua faia e le Malo”.
