A toe autiloina galuega faalaufali i le taamilosaga a Aukilani Samoa talu ona faavae mai lenei taamilosaga, masalo e anoanoai le tele o mataupu e ono faaluafesasi ai galuega Faalaufali ma le atamai i le taaloga e aunoa ma le malamalama i tulafono o le taaloga.
Atonu o le isi lea galuega tele sa faia ina ia faalelei atili pea lea matafaioi faapea ai foi le tulaga e tatau ona silafia lelei ai e le tama taalo e tusa ai ma le tulafono o le taaloga, ua matua le Aukilani Samoa ma o loo faaauauina pea lona maopoopoga lelei i le tausiga vaa tele i tamalii o loo galulue auaufaatasi ina ia tumau pea lea atoatoa i le lumanai.
O le galuega Faalaufali, o se tasi o vaega tāua o loo faaauauina pea e le Aukilani Samoa i tausaga taitasi, o le faia lea o Workshop e faamalamalama ai tulafono faapea ai foi ma tulaga e ao ona silafia e tama taaalo i taimi o le taaloga faapea ai foi ma pulega o Au taitasi i tapenaga ma sauniuniga i taaloga o le taamilosaga i tausaga taitasi.
I le mae‘a ai o taaloga o sailiga Siamupini sa feagai ai ma le Aukilani Sanmoa i le faaiuga o le vaiaso na se‘i mavae atu nei, ona alo atu ai loa lea o le Afioga i le Peresetene a le Aukilani Samoa ia Aiolupotea John Roache ma le Iuni e faatino se faaafe i lea afiafi e faafetaia ai galuega tauave a alii ma tamaitai laufali, i lo latou sao tele i le faaleleia o le taamilosaga e ala lea i le faafoeina o taaloga ma faamalosia ai tulafono o loo tautaia ai taaloga lakapi i Niu Sila nei.
Sa muamua saunoa le afioga ia Aiolupotea John Roache e momoli le agaga faafetai mai le Aukilani Samoa i faiva ma galuega faalaufali sa fitaituga i ai alii ma tamaitai, ma e lē o se galuega faigofie ae ua faaeleelea lava ona o le naunau ina ia atia‘e alo ma fanau a Samoa i se nofoaga o loo faafaileleina ai le taleni mo le lumanai.
Sa tali saunoa mai i ai le alii laufali sinia ia Roger e faafetaia foi le amanaiaina o le galuega faalaufali, ma le faamoemoe e augofie lava le Asosi o laufali a Aukilani e talisapaia taamilosaga o loo faagasoloina pea e le Aukilani Samoa. Sa faafetaia foi avanoa tāua mo alii ma tamaitai laufali e faatinoina ai o latou tiute.
Na mae‘a lea ona alo loa lea i se taumafataga ma se fiafia tele e faatino ai le agaga talisapaia ona o le sao tāua o alii ma tamaitai laufali seia oo lava ina ua tuleva le afiafi i lea lava po.
Na ta‘ape fiafia lea afiafi ma le loto faamalieina ia i latou uma sa auai ai i lea po.
