Ole masina fou lenei o Aperila ua amatalia ua amata faagasolo ai le suesuega ua gafa ma le Komesina o Sulufaiga ma lona ofisa e aoao mai ai faamatalaga mai nuu ma afioaga ole atunuu mo le sailia oni fofo ma se fesoasoani e faaitiitia ai sauaga i totonu o aiga poo domestic violence.
E faapea foi ona saili ai ni finagalo faaalia mai alii ma faipule o nuu ma afioaga ini auala sili ona lelei ile soifua o aiga Samoa i aso taitasi e fofo ai lenei faafitauli.
Ole suesuega lenei oloo naunau ai le Komesina le afioga Maiava Iulai Toma e galulue faatasi ma le vasega o tusitala ma tagata faasalalau ile faasalalauina o taualumaga ole suesuega aemaise ia mataala foi le aufaasalalau ma tusitala ile maaleale o nisi o faamatalaga e ono faamanualia ai finagalo o nisi pe a faasalalau.
Ole vaega tonu lava e maaleale oni tautinoga mai nisi o tina ma tamaitai ma fanau iti ua aafia ini sauaga. “Ole a iai le avanoa oi latou nei e tuuina mai ai ni a latou faamatalaga i sauaga na aafia ai, ma ua nofo sauni foi le suesuega e saili ni avanoa lelei e faatino ai lea tulaga e aunoa ma le aafia o lagona o nisi tagata”, na saunoa ai le Komesina o Sulufaiga ile aoaoga sa soalaupule ai le pitolaau ale aufaasalalau ma tusitala ao faagasolo le suesuega.
Oloo naunau foi le Komesina e tatala le avanoa mo i latou na faia ni sauaga e faaleo ai ni o latou manatu i mafuaaga na latou faia ai ia sauaga aua na taua ele Komesina e manaomia itu uma ole faafitauli e faasoa atu ona silasila ai lea poo gafea tonu oloo mafua ai ma maua ai poo a ni fofo e tatau ona faatino.
Ole faasalalauina o nei suesuega ole a iai le faitalia ile Komesina ma lona ofisa e taofia ai ni faamatalaga mai le faalauiloaina lautele. E faasino lea ini faamatalaga e fesootai ma ni sauaga mataga poo ni faamatalaga e faailoa ai ni mataupu ini va faaulugalii.
Ole pitolaau ale aufaasalalau e saoloto peitai ole isi itu lea oloo fautuaina ai lea galuega ia silasila totoa e le o faamatalaga uma e tatau ona faalauiloa ona o puipuiga iai latou na aafia i sauaga aemaise lava oni sauaga mataga e aafia ai ni tagata e vava lalata sootaga tau toto.
Ua iai le taiala e lima taitaiina ai le galuega ma e ao foi la i tusitala ma le aufaasalalau ona silasila ile taiala e lima taitaiina ai a latou lipoti ole suesuega”, ole finagalo lea ole Pelesetene ole autusitala ma tagata faasalalau le tofa Apulu Lance Polu na faia faapitoa sana folasaga ile aoaoga sa taulamua ai le ofisa ole Komesina o Sulufaiga e toe faamanatu ai ile aufaasalalau le taua ole latou galuega ma taiala e ao ona faatino ai le latou pitolaau.
