O le susuga Tofiga Peseta o se alii tusitala na iu mai le Iunivesite Aoao o Samoa ma o loo galue nei mo le nusipepa a le Malo o le Savali

O le susuga Tofiga Peseta o se alii tusitala na iu mai le Iunivesite Aoao o Samoa ma o loo galue nei mo le nusipepa a le Malo o le Savali

O Tofiga Peseta na soifua mai e iai ona manaoga tumau e le mafai ona savali, ae sa alu i le a’oga e pei lava o fanau uma a le atunuu e leai ni manaoga tumau o le tino ma le mafaufau. O lona faaeaina na oo ai lava i le Iunivesite Aoao o Samoa ma a’oa’oina ai le tomai i le galuega faasalalau ma tusitala.

O ia na avea ma sili aoao o le vasega faauu a le A’oga tusitala a le Iunivesite i le lima tausaga ua mavae ma o le taimi nei ua galue i le nusipepa a le Malo o le Savali. Na ia faamatala lona ola finau ina ia vaai mai isi tamaiti e atoatoa le malosi e mafai foi ona ia faia mea o loo latou fai ae aua nei vaai atu e le mafai ona savali ma le mafai ai foi ona alu i le a’oga ma ausia ni tulaga maualuluga i lona soifua a’oa’oina.

“O le luitau lena o lea sa ou ola mai ai, ma ou te manao la e avea a’u ma faata’ita’iga mo isi o’u uso ma tuafafine e iai manaoga tumau.” O le Nuanua o le Alofa o le faalapotopotoga e faia polokalame mo le lelei ma le manuia o tagata e iai manaoga tumau i Samoa.

O le vaiaso ua mavae na faia ai se a’oa’oga a le faalapotopotoga na valaaulia ai alii ma tamaitai talavou e iai manaoga tumau e faatatau i avanoa e maua ai a latou galuega, ma ia ola finafinau ma tauivi e ausia ai nisi avanoa lelei e maua ai a latou galuega. “O le sini lena o le a’oa’oga lenei o loo valaaulia ai nisi o sui mai le faalapotopotoga o pisinisi e sasaa mai le latou faasoa i ni avanoa e maua ai galuega mo sui o le Nuanua o le Alofa o loo tau saili ni galuega”.

Faaalia e Tofiga e ui foi o loo maua lana galuega o se tusitala i le nusipepa a le Malo ae e iai lava taimi i le siosiomaga o le ofisa o loo galue ai e nate faalogoina ai le i’uleo o ia e iai galuega nate le mafai ona faia ma e pei e faasinosino lima ai isi tagata o le ofisa ia te ia. “Ou te lagona lava le I’uleo lena i nisi taimi ae e le avea lena ma pogai o lo’u solomuli mai le faia o la’u galuega ma o se isi lena lu’itau mo matou e iai manaoga tumau ae o la’u fautuaga ia aua nei faavaivai ai e finau”.

Ua faaalia e le Pelesetene o le Nuanua o le Alofa ua maualuga le numela o tupulaga ua iu a’oa’oga ae e iai manaoga tumau ua maua galuega, ma o le tuualalo lea o loo ave pea iai latou e ana galuega e tatala le avanoa mo tagata e iai manaoga tumau e faafaigaluega ai. O seleni latou te maua e fesoasoani ilo latou atinae aemaise o nisi ua fai taitoalua ma fanau ma e le tatau ona ola faalagolago i isi tagata oo latou aiga.