“Ou te lei iloa ua leva ona pipii lo‘u igoa i le lisi o tagata o le a fasioti e le alii lea.
Ua laki lava lo‘u malosi semanu e matautia se vaaiga ma se mea ou te oo i ai”
O le faamatalaga mautinoa lava lea a le tama talavou sa aafia i se faalavelave i Massey Aukilani i Sisifo, ina ua feiloai i ai ma suesueina le mataupu sa tumutumu ane ai leoleo i lea itu o le aai tele o Aukilani.
O le tea o le lua i le vaveao, pe tusa ma le lua vaiaso talu ai, na tupu ai se faalavelave semanu e maimau ai le soifua o se alii Samoa i le itu i Sisifo o Aukilani. Ua tea nei i tua lea tama talavou ina ua toe manuia ona manu‘a i se tamai naifi, ina ua taumafai le isi tama Samoa e fasioti o ia. Sa molimauina e le Samoa Times, manu‘a i foliga o le tama lea, ma faamaonia ai le tulaga matautia o lea foi faalavelave ma sona taunuuga semanu e oo i ai.
O se talanoaga ma le tama na aafia, sa ia faamatala ai le mafuaaga o lea vevesi sa tulai mai, e pei foi ona sa lipotia i luga o le Radio Samoa i ni nai itula mulimuli ane i le aso lava na tupu ai lea faalavelave.
Sa ofo le loto i le mafai ona sola ese mai lē na aafia i le gaioiga faanatinati ma osofaiga a lē na ia faatupuina le vevesi, pe a fua i le faamatalaina o le amataga ma gaioiga uma sa tupu, atoa ai ma lona taunuuga na faasaoina ai lē o loo manu‘a.
E lē o manao lē na aafia e faailoa lona igoa ma lona ata i luga o le nusipepa, ona o puipuiga ma le taofiofi i nisi vevesi e ono tulai mai mulimuli. Peitai sa lē āfaina lona tuuina mai o faamatalaga uma i le mea na tupu.
O ia sa nofo i totonu o lana taavale i luma lava o lona fale ma faalogologo i lana laau. E lei mamao ona fautua ane lona toalua ma faapea ane, e alu atu loa e mālōlō ma moe ona ua leva le po, pe tusa o le tea o le tasi i le vaveao, ma sa toe foi lona toalua i le fale ma tapuni le faitotoa.
Pe tusa o se minute na tape ai lana laau, ma sauni loa o le a agai e fai se malologa i lea taimi, ae faafuasei ona pa‘ō le faitotoa taumatau o lana taavale sa faalagolago i ai lona lima.
O lona liliu ane i le itu sa pa‘ō, ae vaaia loa le oo atu o le lima o loo uu ai se tamai naifi. Sa vave ona ‘alo ese ma see ai ma le tui i le pito o lona alafau, ae sa ia mautinoa sa fuafua le gaioiga a le alii lea i lona muaulu, poo ona foliga foi.
Sa ia mautinoa i lea taimi e itiiti lava se faasaoina o ia, pe afai e nofo ai pea i totonu o le taavale, ma sa ia taumafai ai loa e tetee ese le tagata lea ma oso faamalosi i fafo.
O ia gaioiga uma sa faia, a o taumafai ane pea e tulimatai ma apo le lima o loo uu ai le naifi. Sa ia faamatala o lea taimi atoa sa lei mālōlō osofaiga o tui agai ane i lona ulu, i le naifi lava lea.
Sa maua se avanoa laitiiti lava e tau sola ese ai ona o lona lava malosi, peitai sa toe aapa ane le alii lea i ona vae ma toe toso ane ma fai lava le galuega o le tatui o ia i le tamai naifi lava lea sa uu i lona lima. Na iu ina maua ma lona ofu mafanafana sa fai ma atili toe mau ai le uu a le ula lea ia te ia, ma fai pea lana galuega o le taumafai e fasioti ia te ia.
O le isi tui na lavea ai lona ulu ma le isi na āfaina ai le isi ona tau‘au peitai o lona toe malosi lava sa iai, sa tauivi ai pea ma tetee le lima o loo iai le naifi.
O le mafuaaga lea na laki ai ma lē āfaina ai i ni manu‘a tuga ma le tigaina, ae semanu ua leva ona leai ma faasola ia e le tagata leaga.
O le tala a lē na aafia, o lona lava tuaoi le tagata lea sa taumafai e fasioti o ia, ma o lea tagata masalo e latalata i le fitu futu le umī, ma e tino ese foi, ma sa iai lava lona manatu ailoga a mafai ona sola ese mai ai. Na ona mamulu lava o lima o le alii lea, ona sa ia mautinoa ua sela, oso loa ma tamoe ese e lei toe faatali, ma sa agai sa‘o lava i le isi fale taulalata ane, ona o lona manatu e musu e sulu i lona fale, nei aafia ai lona toalua ma lana fanau.
O se aiga palagi na fesoasoani ane, ma valaau ai loa leoleo, faatasi ma le taavale a le falemai. Na ta‘ua e le uso e faapea, na iu lava ina matapogia, ona masalo ua vaivai tele lona tino, ma le tele o le palapala ua alu ona o ona manu‘a.
Taunuu leoleo ma amata ai suesuega
Na te lē iloa se isi gaioiga a le tagata lea na fai, ina ua ave o ia i le falemai, ma o le molimau a leoleo e pei ona faamatala e lē na aafia ma lona toalua, e oo mai i le taimi nei, o loo sailia pea e leoleo le naifi e lei maua, poo fea na tia‘i ai, pe o nanā foi. Peitai o le lipoti a le falemai, sa faamaonia ai o le naifi lava sa aafia ai, ma sa faaoo ai manu‘a. O le aso na sosoo ai na tulai ai lē na faatupuina le faalavelave i luma o le faamasinoga, ma ua toe tatala i tua e faatali ai le vaiaso fou e toe foi ane ai mo le suesueina atili o le mataupu.
O le aso foi lea, o le a tali ai i ona moliaga o le taumafai e faaoo le oti i se tagata, e pei ona faia i ai faasaga ia te ia e le ofisa o leoleo i Henderson.
O le tea laititi o le fitu i le taeao lava na tupu ai le faalavelave, na taunuu ai le sui o le Samoa Times ma le Radio Samoa i le nofoaga tonu sa tupu ai le faalavelave, ma faalauiloa ai le vaaiga sa iai i lea taeao.
Peitai sa tālia pea se faamatalaga a leoleo, ona sa lē mafai ona faamatuuina ni faamatalaga i lea lava taeao, ona sa faia suesuega a le ofisa o leoleo agai i le mafuaaga o le mataupu ma faia ai loa moliaga.
Sa faaalia e le uso na aafia e faapea, e lei fiafia i le faaiuga sa faia ona talu ai, sa vaaia pea le alii faatupu faalavelave, o loo agai ane pea i lea faaitu, peitai ua mae‘a ona ave i ai le poloaiga a le faamasinoga, e taofia ai le toe ulufale i lona fale, ma e tatau foi ona aua ne‘i toe latalata ane i le nofoaga o loo iai lē na aafia.
Ua toe faia nei i ai se isi faaiuga talafeagai a leoleo, ina ia saga puipui ai le saogalemu o le aiga sa aafia, aemaise o se puipuiga foi lea mo le alii ua molia nei, ina ne‘i iai nisi tulaga taui ma sui e ono faateleina ai se isi faalavelave e toe tupu mai.
Ua mae‘a foi ona logoina le Matagaluega o Fale o le Malo i le mataupu, ma sa faamaonia e le aiga o loo aafia, ua amata gaioiga a le Housing Niu Sila, mo le faagaioia o se isi nofoaga fou mo latou e toe sifi i ai mo le taimi nei. E lē taumate o se faaiuga foi o le a faia i le alii fasi tagata, o le a toe fāoa foi lona fale ona sa faamaonia, e lē na o le pau lea o se faafitauli ua tupu mai i le tagata lava lea, ma le fale o loo nofo ai.
