O faiga piopio ma gaioiga faaalatua i totonu o faigamalo, pulega o faalapotopotoga, pisinisi aemaise o totonu o ekalesia ma nuu, o ni mataupu e suamalie i le manaoga o tagata latou te fia silafia, pe afai ua tele so latou aafiaga i ni faaletonu faapea e aliali mai.
O aafiaga foi o tagata lautele mai ni fuafuaga ma ni pulega ua lē lelei, o nisi ia o mataupu e fia maua ai e tagata ni faamatalaga, pe aisea ua tupu ai, o ai na mafua ai, ae poo fea foi ua lape ai, aemaise pe faapefea ona toe faaleleia.
O le suesueina o ni mataupu e alii ma tamaitai tusitala e lē faigofie ona e tatau ona matuā saili ia maua le autu, ma ia na o mea moni e faasalalau mo le silafia e tagata.
O le mafuaaga lea na toe faamanatu mai ai e le tamaitai tusitala sinia mai Ausetalia o Sharon Davis, vaega e ao ona nofo silafia i ai tusitala ina ia alofia ai le lamatia o lo latou siosiomaga saogalemu ma le saogalemu o i latou e maua mai ai ni mataupu latou te suesueina.
Faaalia e le toatele o tusitala na auai i le aoaoga le faatoa latou silafia lea o nisi vaega sa lē manatu e tulai mai ai ni faaletonu i le latou galuega, ae o lea ua malamalama nei i itu e ao ona faaeteete i ai pe a faia se suesuega. O le itu tāua i le aoaaoga e tasi le vaiaso sa faatupe e le PACMAS o se polokalame fesoasoani a Ausetalia mo le faaleleia o galuega i totonu o faasalalauga i televise, leitio ma nusipepa ia faaoloaina tusitala i le tomai e faia ai le galuega.
E tele luitau o le galuega faatusitala e pei ona faaalia e le tamaitai faiaoga o Sharon Davis, ona a lē faia ma le mata poto ma mataalia e taunuu i se tulaga lē manuia le galuega a se tusitala i le molia i le faamasinoga ona ua lē atoatoa le lipotia o se tala i se mataupu e ogaoga ni ona mafuaaga.
O le luitau tele lea o loo feagai foi ma tusitala i Samoa e pei ona faaalia e se tasi o tusitala sinia i se nusipepa sa auai i le aoaoga.
“O le tele lava o taimi e tatou te naunau e faasalalau loa se tala ae e lei mae‘a ona sailiili lelei ma maua vaega e ao ona aofia i se tala a o lei faasalalauina, ma o iina lea e mafua ai ona feagai le galuega ma faitioga”.
O le isi mea e sili ona tāua e pei ona faailoa e Sharon Davis, o loo iai vaega ua saunia e maua ai faamatalaga tāua i pulega a le Malo e agai i ai tusitala e faia ai a latou suesuega ina ia maua tonu le ‘au o le paipa ae peitai e tele lava ina lē manatu mamafa i ai i le tele o taimi.
O loo toe manaomia e tusitala i Samoa se avanoa faapea e aoaoina ai pea i le galuega auā o se fesoasoani sili ma se faamanatu lelei mo le latou pitolaau tauave i aso uma.
