Tatau ona maua se faaiuga o suesuega i ni leoleo

“Pe ana o la‘u vaaiga o loo iai le vaega suesue o faia sailiiliga semanu ua leva ona tatau ona maua se faaiuga, ua umi tele”. O le finagalo lea o le afioga Leaupepe Lealaitagomoa Fatu Pula, ina ua fesiligia poo ua maua se taunuuga o sailiiliga ma suesuega faasaga i ni alii leoleo ma se tamaitai leoleo o loo tuuaia i ni mataupu e mafua mai i le faatinoga o o latou tiute faaleoleo.

O le mataupu o loo tuuaia ai se tasi sa avea ma leoleo sinia ua malolo litaea, faapea se alii leoleo o loo galue pea, e mafua i se taualumaga o le faamasinoga o se tasi ua faasalaina i le umia o laau faasaina.

Sa faailoa e lea tagata i le faamasinoga o ia alii leoleo o nisi e masani ona o atu ia te ia e faatau mai ai a la maruana.

O se isi mataupu o loo suesueina e le vaega o amioga taualoa a le matagaluega o se imeli na faia e se tamaitai leoleo ae faaaoga ai se tuatusi o se imeli a se alii leoleo na ave i le nusipepa o le Observer ma faasalalau ai, peitai na iloa mulimuli ane e le o le alii leoleo na faia le imeli ma faia ai se faatoesega a le nusipepa.

O le tasi o mataupu e lei maua lava se faaiuga o se tusi faaseā a se alii pagota o loo ta‘ua ai le faaoolima o ni leoleo o le falepuipui i ni pagota ma le lē fetaui o faaiuga o loo faia i le vave Aso Sa i tua o nisi e lei oo i le taimi e maua ai lea faamanuiaga.

O se tasi o mataupu o loo ave ai se faaseā a se tamaitai leoleo faasaga i se alii leoleo sa ia taumafai e faia se gaioiga fai faamalosi ia te ia, a o la galulue faatasi i le ofisa o leoleo o loo i Tuanaimato.

“E fai si tele o mataupu nei, ma o loo tuifesili pea au e tusitala i taimi uma e maua ai feiloaiga, ae ou te le iloa poo fea ua fai i ai, pe ua maua ni faaiuga pe leai”, na saunoa ai Leaupepe.

O le tasi lea o pogai ma mafuaaga e faitioina ai e nisi o le atunuu le faatinoga o le pitolaau a leoleo i suesuega e aafia ai isi leoleo ona o le umi ona toso.

O le komisi suesue o loo faagasolo o loo suesueina ai le faatinoga o tiute o nisi o leoleo i le mataupu i le alii Nigeria o William Okoro, o loo silasila ai le komisi i se tali o le fesili, pe talafeagai le toe suesueina e leoleo o ni faaseā ma ni tuuaiga e aafia ai nisi leoleo poo le Malu o le Malo.

O se lipoti maeaea a lea komisi o le a mafai ona maua ai se maninoga atoa o se tali o lea fesili.