O le tasi lea o mau i le lē fiafia o le atunuu i le faaiuga o le taaloga a le Manu Samoa ma Iapani i le amataga o le vaiaso.
Ua tele le mau faamatalaga ua tuua‘ia ai le faaletonu o le ‘au. Ua tuua‘ia le taaalo pea i le Aso Sa. Ua tuua‘ia le leaga o le filifiliga o le ‘au, tuua‘i le lē taaalo o se ‘au ae alu lava le tagata ia. Tuua‘i le vaivai o mafaufau pe a fua i le taaalo a Iapani.
Ua lē iloa se mau faamatalaga ua fai ae fai mai le isi alii sa fofo lagolago i le Manu Samoa taitoa 7 lea na siamupini i le IRB 7s o le lē aai i le marmite.
Na taliē i le faamatalaga a Tusa Junior Tavau, ae e leai ma se ata o lea alii ma ia faapea mai, o le taimi a o avea ai ma faiaoga lagolago o le Manu Samoa i le taitoa 7 a o faiaoga ai John Boe, ma le taimi o faiaoga Laauli Michael Jones i le au taitoa 15 na unai ai le tausasami o le Manu Samoa i le marmite. O lea na manumalo ai le taitoa 7 a Samoa mo le uluai taimi i le taamilosaga a le IRB.
“O le marmite e iai le vaitamini e ta‘u o le B12 e maua ai le malosi lea e fai atu ai e mautinoa lava o loo fafaga ai le ‘au a Iapani na manino lava foi i le taaloga ma Aferika i Saute o loo tausi lelei le ‘au a Iapani i le marmite,” o le faamatalaga lea a lenei alii.
Ua tau lē leotetele le talie auā o le marmite e gaosi i Niu Sila ae o le ‘au lea e siamupini i le lakapi a le lalolagi, le All Blacks o le ‘au a Niu Sila, o lona uiga o loo fafaga lelei lava tama Niu Sila i le marmite.
E ui o lea o le mau a le alii faiaoga taiulu ia Stephen Betham, sa iai lava le faamaualuga e agai atu i le taaloga ma Iapani e mafai ona faatino le tele o a latou fuafuaga peitai ua lē taunuu ma ua lē lelei lava le tulaga tau i le taalo pulea i totonu o le malae lea na umi ai se taimi na taaalo ai le ‘au a Samoa na o le to‘a 13 ia na taaalo.
O le umi o lea taimi na talitonu le faiaoga taiulu na mafua ai le lē mafai ona faatino gaioiga na aoaoina ma toleni ai tama o le Manu Samoa.
E lē fia vaai i luga o le facebook ma isi upega tafailagi i osofaiga ua faia e tagata o le atunuu i le faigata o le tapuaiga ae malolo mai ia Iapani. O lona uiga ua leai lava se Manu Samoa mo le Quarter Finals.
O le isi tulaga faigata o le aumaia o le taaloga i Samoa e $250,000 tala lea na totogi e le TV tasi e aumai ai taaloga nei ina ia mafai e le atunuu atoa ona maimoaina taaloga ae o lea ua vaai atu o le a toe taa‘i fala ae toe agai mai ua lē manuia taumafaiga.
Ia e ui o lea o loo iai lava le toatele o loo lagolago malosi i le ‘au a le atunuu ma le faamoemoe o le a iai se suiga o le ‘au a le atunuu i le agai i luma.
