Ose vaegatupe e tusa ma le 20 miliona tala Samoa oloo fuafua le faalapotopotoga o taaloga a Samoa le SASNOC e faatupe uma ai le taligalo mo taaloga ale Pasefika ile tausaga e 2019 pe afai e laki le ofo a Samoa lea ua tauaao ele pulega o taaloga ale Pasefika.
Na faailoa lea aofaiga ole tau ole taligamalo ina ua fesiligia sui ole Fono Faatonu ole pulega o ia taaloga, ina ua maea ona silasila ma asiasi foi i nofoaga o taaloga eseese i Samoa.
Na feiloai le aumalaga le susuga Vidhya Lakham ole Peresetene ma le Ofisa sili o Andrew Minogue ile Palemia ma le Minisita o Taaloga ma le Minisita o Tupe. Sa feiloai foi ile Peresetene ole SASNOC le susuga Patrick Fepulea’i faapea sui o taaloga e 26 ole a faia pe manumalo le ofo a Samoa.
Fai mai Lakham e maofa tele ile lagolago ale Malo o Samoa ile aumaia o taaloga e faia i lo tatou atunuu ma ose itu taua lea ile toe lua tausaga faia nei taaloga ae e le’o solomuli ai le finau a Samoa.
Peitai na ta’ua e Lakham e lei oo le la asiasiga i Guam ma Tahiti o isi atunuu oloo ofo mai foi e fai atu io latou laufanua taaloga ale Pasefika ole 2019.
Ole tolu aso sa faia ai le asiasiga ale Peresetene o taaloga ale Pasefika ma le Ofisa sili na faamalieina ai ile tulaga oloo iai nofoaga mo taaloga seia vagana nisi o nofoaga e manaomia ni galuega e toe faaleleia ai, peitai ua tautino i laua e le oni galuega tetele.
Ua faamalieina foi ile folasaga ale Palemia ile latou feiloaiga ole a fesoasoani Saina e toe faaleleia nisi o faletaalo e pei ole nofoaga o taaloga ile Apia Park.
Ole faletaalo mo taaloga Netipolo ile Apia Park lea sa faaaoga i taaloga ale Pasefika ile tausaga e 2007 ina talimalo ai Samoa ua faaletonu nisi o malae ma le tutulu ole fale. Ua faaalia ele Peresetene ole SASNOC e le tele ni galuega mo le faaleleia o lea nofoaga o taaloga.
Ole isi tulaga na maualuga ai le silasila ale Peresetene o taaloga ale Pasefika ma le Ofisa sili ole tomai oloo ia Samoa e faatino ai tapenaga aua e lei leva ona faia ile atunuu taaloga a Tupulaga o Malo ole Taupulega ole tausaga e 2017, faapea ma taaloga ale Pasefika ole 2007.
A fua iai e pei ona faaalia e Lakham e faigata mo se atunuu ua 27 tausaga e lei toe lotolotoi ini taligamalo tau taaloga e 3 afe tagata taaalo ma ofisa e auai.
Ole tuua o Samoa e sui ole pulega o taaloga ale Pasefika ua mafanafana ai le SASNOC ma le Malo o Samoa ua matua faamalieina le asiasiga ile tulaga oloo iai nofoaga o taaloga a Samoa ma ole tatalo faatauanau ia to mai le lagi se tali faaaliali e manuia ai le ofo a Samoa e talimalo.
