O le tofa Taua Faraimo sa tulai i le tofi faipule o Palauli i Sisifo i le paeaiga ua mae‘a a le palemene ma sa avea o ia ma sui faipule o Palauli i Sisifo.
O se tasi o faipule tutoatasi sa agaia le Malo i lea vaitau mai le 2006 i le 2011 a o lei faia le palota tele a le atunuu i le masina o Mati o le tausaga lava lea na malolo ai ma lē toe maua se isi ona avanoa i le tofi o lona itumalo.
E tele tala sa maua i le tulaga sa iai faaiuga a nuu ma afioaga o itumalo eseese i ni sui e ave i ai le latou lagolago atoa ai ma ni vaega faaupufai.
O Taua Faraimo le sui tauva o le Tautua Samoa, sa faaalia e se molimau sa faafaigata lona nuu ona talia lona toe tauva i le palota, ina ua iai se isi sui mai lona afioaga ua lilifa i ai le lagolago.
Sa laumanuia ai tala i se faaiuga e faatulai ese o ia pe a lē nofo ae ave le lagolago i le sui ua finagalo i ai le afioaga. Peitai na faaalia e Taua i lana folasaga i le komisi suesue, e ao ona aiaia faaletulafono ia ituaiga o faaiuga, ina ia lē mafai ona toe aiāina ai e alii ma faipule o se nuu, le aiā tatau o le matai o loo nofo i le nuu ma fai le tautua ma le monotaga ina ua iai se isi matai ua ave i ai le latou faamuamua.
O le molimau a Taua i luma o le komisi masalo o le isi lea mafuaaga na lē manumalo ai.
Na ia ta‘ua foi o le faia o se aiaiga faaletulafono e noatia ai se faaiuga faapea a alii ma faipule, o le a mautinoa le mausali ai o le faatāuaina o le aiā tatau o tagata aemaise lava o le aiā saoloto a se tagatanuu o Samoa ua umia se suafa matai, e tauva ai ile palota.
O atugaluga o lea tamalii ona e iai faaiuga faapea a nuu ua iu ina ia mu ai le foaga, ma afaina ai se matai ma sona auaiga.
O le tasi lea o vaega sa matauina i aso amata o galuega a le komisi suesue sa agai i ai finagalo o sui na oo atu mo a latou folasaga, e faasino i le tiute o se pulenuu na te faamaonia le monotaga o loo faia ma le tautua i le nuu a se sui tauva, faapea le faamaonia ua lesitala faaletulafono le suafa matai o se sui tauva.
O loo atagia manino i lagona faaalia i lea tulaga le feteenai ai o le tulafono tau faigapalota ma aiaiga ua tuu i ai, ma le finagalo o alii ma faipule i le va nonofo ai o tu ma aganuu a Samoa o loo pulea ai nuu ma afioaga.
Sa faaalia se finagalo o le taitaifono o le komisi le afioga Maiava Iulai Toma, pe faamata ua lē tatau ona faia se faiga e taofia ai le toe feteenai o le aiā faapulega a matai, ma le tulafono o faigapalota ma polokiki o se mea na aumai mai fafo.
E manatu le taitaifono o se tasi lea o tulaga o loo matauina o feteenaiga o faiga mai fafo e faatino ai se palota e sailia ai faipule ia tusa ai ma faiga ma pulega faatemokarasi.
Ae o loo iai foi tu ma aganuu a Samoa o loo vaavaalua ma le tulafono. E iai se lagona o le taitaifono na ia folasia a o faagasolo taualumaga a le komisi, pe lē ua tatau ona faia se isi faiga e faapea ai a oo loa i le palota ona faatino lea o faiga mai fafo i le tulafono e faatino ai faiga filifiliga e tusa ma faiga faapolokiki, ae taatia tu ma aganuu a Samoa ina ia taofia ai le feteenai pea o ia vaega e lua.
