Ile lua masina ua savalia talu ona faamalolo lē tumau le Komesina o Leoleo ona o moliaga ua molia ai nei, e lei va ini vaiaso ae faia se suesuega faalotoifale ale Matagaluega ise tasi o laau malosi e lē faatagaina i Samoa ole ituaiga ole AK-47 lea na ave ele ofisa ole Tiute i leoleo e faatama‘ia ae mulimuli ane vaaia lea laau malosi oloo feaveai pe a oo ina faia ni osofaiga a leoleo e saili ai laau ma pauta faasāina.
O lea suesuega ua silia ile masina o faagasolo ma e oo mai ile taimi nei e tasi lava le tali oloo aumai ele sooupu ole matagaluega o leoleo oloo faia lava sailiiliga.
Peitai ua oo mai ni molimau faatuatuaina ua faailoa mai e faapea, ua mae‘a le suesuega ae ua lē iloa pe aisea ua tuai ai ona faia se faaiuga a sui Komesina oloo tauaveina le pulega ole matagaluega pe iai ni moliaga e faia ae poo ai foi e molia.
Ole suafa ole Komesina oloo faamalolo nei lē tumau oloo laumanu‘ia sa ia umia lea laau malosi i taimi o osofaiga.
Oloo iai foi ni molimau e lei faamaonia e faapea e iai aso sa mafai ona aveesea ai le laau malosi mai le nofoaga oloo teu uma ai fana a leoleo.
Sa fesiligia le sooupu o leoleo ile Aso Tofi ua mavae pe ua maua se faaiuga o suesuega ae o lana saunoaga e leai. “Oloo faaauau lava suesuega ma e lē o iloa se taimi e mae‘a ai”. Ose tasi mataupu oloo toso pea se faaiuga mai le Minisita ole matagaluega o leoleo ma le pulega ole matagaluega, ose mataupu oloo tuua‘ia ai se tasi o Komesina lagolago.
O lea mataupu oloo faaalia ai e ni molimau talitonuina sa faatino ai e lea komesina lagolago se faigaaiga ise tasi o tamaitai leoleo talavou. O lea gaioiga na tupu ile nofoaga ole Tofamamao i Leauvaa sa faia ai se fiafia a tamaitai leoleo ina ua mae‘a se latou faatasiga poo se retreat sa faia i lea nofoaga. Sa auai le Komesina lagolago i lona tulaga ole sui komesina ona ole valaaulia mai tamaitai leoleo ile tapunia ole latou faatasiga lea sa faaiu ise fiafia ae tulai mai ai lea gaioiga.
Ole suesuega na faia ile mataupu lenei ua i aao ole Minisita ole Matagaluega le afioga Sala Fata Pinati le taunuuga.
Ose molimau faatuatuaina na ia faailoa ua ta‘utino le Komesina lagolago oloo tuua‘ia ile mea na tupu.
Ua maua foi se faamatalaga mai se molimau talitonuina sa oo le tamaitai leoleo na aafia ile ofisa ole Toomaga mo ē Puapuagatia mo se fesoasoani ina ua iloa ele toatele ole matagaluega ile vasega o Malu ole Malo le mea na tupu. Tasi lea mataupu ile matagaluega o leoleo oloo leoleoā ai le pulega ua lē pisa ma ole fesili pe aisea.
Oloo fesiligia nei le tulaga ole lē faia ose gaioiga ale Minisita i lea komesina lagolago ma ua gugulu ai le toatele o leoleo ma ua tuufesili poo ai a aafia ini gaioiga e lē talafeagai ma se leoleo ona ia faia, ona vave lea ona suesue ma faia moliaga, ae poo ai e tupu ai ni faaletonu ae ua gūgū ma lē gagana le Matagaluega e amata mai lava ile pulega e oo ile Minisita e tatau ona ia faia se fautuaga ile Palemia ma le Kapeneta.
