O le molimau a le paia lautele o Samoa i Melepone, ua manuia ma laki i ata DVD nei mai Samoa ona o le tautua matavela a le Kiwi Pacific Store a le fetalaiga ia Autaloto Junior ma le tausi ia Rebecca, aemaise o lo latou aiga alii, ona o le tele o taimi e muamua lava silasila maimoa ma matamata Melepone i ata faatoa faagasolo ai lea i isi aai ma isi atunuu.
E pei foi la ona tulai mai i le Aso Toonai na tuanai atu, lea na faalauiloa ma amata faatau ai le vaega mulimuli o le ata logologoā o le Toe Foi le Tama Savaii i Melepone, ona gasolo ai lea i isi setete o Ausetalia i se taimi o le vaiaso nei.
I le molimau a nisi o le atunuu i le mae‘a ai ona silasila i le vaega lona fā lenei, na latou saunoa ai o le vaega pito i mataina lenei o le ata atoa, e lē gata o le tāua o le aoaoga o momoli mai ai, ae o le matagofie ma le mālie o lona faatinoina.
Ua talafeagai tonu le taimi ua tatala ai le ata ma le latalata i le Kirisimasi, ona o le a faatau e faimeaalofa ai mo tauaiga. Momoli le faafetai i le Kiwi Pacific Store aemaise o le kamupani ma le pulega o le Ata ona o la outou galuega mae‘ae‘a ma le tautua matagofie mo Samoa.
