E lē mafai ona galo le afi na faatamaia atoa ai fale Samoa tetele o se faletalimalo ua leva i totonu o Samoa, le Tusitala i le ogatotonu o le tausaga na tea nei.
O lea ua atoa le tausaga o lea faalavelave ae o lea ua toe tatala faitotoa o lenei faletalimalo i tagata asiasi mai i fafo.
O le Tanoa Tusitala na tatala aloaia lona vaega muamua o atinae ua faataatitia mo le faaleleia atoa o lenei faletalimalo.
O le vaega muamua lea ua lē gata ina toe fausia ai potu o taligamalo i nofoaga ia e lei oo i ai le sasao a le afi i le tausaga na tea nei, ae ua toe fausia se maota mo taumafataga a Malo atoa ai ma le nofoaga o taelega lea ua aofia ai ma se faleaiga ma se pa pia ua tatalaina nei.
E lei faatelē le tatalaga o le vaega muamua o lenei atinae ona na ta‘ua e le alii Ofisa Sili o le Reddy Hotel Group – le kamupani ua pulea nei le Tanoa Tusitala mai i Fiti, e lua isi vaega tāua lava e tatau ona faatino a o lei oo i se tulaga e tatala aloaia ai loa lenei galuega tele.
Faaalia e Gordon Wilson, e lē mafai ona ta‘u mai le tau atoa o le galuega ua iai nei ae e mafai ona faapea mai ua faitau miliona seleni ua alu i le faatauga o lenei atinae mai i le Pulega o le Kitano Hotels lea sa pulea le Tusitala aemaise o le toe faaleleia atoa ai o nofoaga ia na faatamaia i le afi i le tausaga na tea nei.
O le taimi lenei i le toe avanoa ai o potu mo malo, faapea galuega ua mae‘a ua toe maua ai ma le avanoa e faafaigaluega ai le toatele o tagata Samoa ua oo atu mo galuega i lenei atinae.
O le taimi lenei e to‘a 78 le aufaigaluega atoa mai i Samoa o lenei atinae ma o le faamoemoe e toatele atu nisi e maua galuega pe afai e mae‘a isi fale o loo faaauau ona fausia i le taimi lenei.
“O le taimi lenei o le vaavaai a le Reddy Hotel Group, o le faletalimalo i Samoa nei o le a agai i taligamalo mo fono tetele o loo mafai ona aumai i Samoa nei, ma o le a lē tau faatalitali i tagata tafafao mai ae o sui usufono ma potopotoga tetele e fia faaaogā nofoaga ua fausia i le taimi nei, o ituaiga tagata na o loo taulai i ai le unai o faatosina a le Tanoa Tusitala i Samoa,” o se faaaliga lea a le alii Ofisa Sili o lenei kamupani.
“O le taimi lenei, e ono faletalimalo a le Reddy Hotel Group ua fausia i Fiti, tolu Tanoa Hotels ua fausia i Niu Sila tasi ua i Vanuatu ma le tasi lea ua faagasolo i Samoa nei ma ua fuafua foi e fausia se isi faletalimalo i Tonga faapea ai se isi i Niue”.
Faaalia foi e Gordon Wilson, o le vaega lona lua o le atinae ua faaauau nei e aofia ai se fale tele mo fonotaga faavaomalo aemaise o se isi faleaiga tele mo malo asiasi mai.
Ua iai foi ma le faamoemoe e faaopoopo nisi fale mo taligamalo lava ia i tagata asiasi mai aemaise o se kalapu a le fanau e mafai ona ofo atu ai auaunaga e ala i polokalame eseese ua faataatitia mo fanau a tagata asiasi mai o loo iai le manaoga e nonofo i Samoa ae ia iai nisi e vaaia fanau pe afai e tele le taimi o mātua e alu i fonotaga a o iai i le atunuu.
O le vaega lona tolu o lenei atinae o le a vaavaai ai loa i le pito i luma o le faletalimalo lea ua leai ni fale tetele sa iai, ae toe fausia atoa ma faaleleia le ulufale atu ai o tagata i lea nofoaga i Sogi.
O le faamoemoe o lenei kamupani e pei ona ta‘ua ina ia vaavaai i vaega o le itulagi o loo ua faatuputupulaia le numera o tagata tafafao mai.
O le faamatalaga a lenei alii, o Samoa o loo vaaia ai le faaauau ona tuputupu lona atinae aemaise lava i le itu tau i tagata tafafao maimoa mai i fafo, ma o loo iai le manaoga o lenei kamupani ina ia lotolotoi ai i lenei atinae, o se auala foi na ia ta‘ua e le gata ina lelei mo le kamupani mai i Fiti, ae o le a telē le fesoasoani i le tamaoaiga o Samoa lava ia.
