Tatala Vaega Lua o le Food World i Laverton Melepone

Susuga i le alii pule, Sharwan ma lona faletua (ogatotonu) ma nai o la alo ma nisi o tamalii sa auai i le faamoemoe
Susuga i le alii pule, Sharwan ma lona faletua (ogatotonu) ma nai o la alo ma nisi o tamalii sa auai i le faamoemoe

O loo tufi taufao e le tele o faipisinisi mai Initia ma Fiti faapea foi nai tamalii mai le atu Asia auaunaga faleoloa o loo faatau i ai le toatele o nai o tatou tagata i le aai o Melepone.

Ua faalautele nisi o faleoloa nei i le tailua a latou auaunaga, o le tulaga foi lea na iai le Aso Toonai na tuanai atu, lea na tatala aloaia ai le vaega lua o le tautua a le faleoloa o le Food World i le pitonuu o Laverton.

O le tautua a le susuga i le tamalii mai Fiti o Shawan ma si ona aiga ua savalia le fā o tausaga talu ona faatamoe i le pitonuu o Laverton, toatele le paia lasilasi o si o tatou atunuu  e lagolagoina ma faatau i le tautua, ae o le vaega tāua sa lē maua i le tautua, o taumafa vela.

Na avea finagalo faaali ma le tuualalo pea a tagata Samoa ma ala na toe sasaa ai le fafao ma toe silasila le pulega, lea la pei ona tatala aloaia lea vaega e lē mamao lava ma le tautua muamua. 

O le sauniga lotu na taitaia e le faafeagaiga Samoa le sui o la tatou pepa i le aai o Melepone Ps Atapana Poe, ma tatalo faamanuia ai mo laasaga uma o le tautua o le a feagai ai, ona ooti ai lea o le lipine ma tatala ai loa ona faitotoa mo le uluai taimi mo faatauga a le paia lasilasi i tagata Pasefika.

E pei lava ona silafia, o faleoloa nei e faatumulia i taumafa Samoa, o le faleoloa fou la, o le a tatalaina mai Aso Tofi i Aso Sa e lē gata o taumafa vela ae faapea foi mo soo se oloa mo le fofoga taumafa o le atunuu.

O se vaaiga i le Aso Toonai na iloa ai le lagolago o o tatou tagata i lenei auaunaga fou, ona o le faatumulia o le faamoemoe o le Food World. Ia saga faalautele e le Atua lo tou faleie.