Ua tutufaatasi faletupe e fā i Samoa e aofia ai le National Bank, Samoa Commercial Bank, o le ANZ ma le Bank South Pacific (BSP) e tatala ni teugatupe e ave i ai foai tupe a tagata i Samoa ma atunuu i fafo. O ia foai e agai tonu i pisinisi na aafia i le mu o le maketi i Savalalo.
O le faatuina o se komiti o mavaega poo se Trust ua aofia ai sui o nei faletupe, faapea le ofisa o le Loia Sili a le Malo, o se ofisa loia tumaoti, ma le asosi o faletalimalo i Samoa o le a taulai ai i le lumanai i ni mala faalenatura e toe aafia ai Samoa. O le a tuusa‘o i ai foai tupe ma nafa lea komiti ma le vaaia o seleni mo le faasafua atu i tagata o le a aafia i ni mala ma faalavelave tutupu faafuasei.
Na faaalia le agaga faafetai o le Palemia, Susuga Tuilaepa Lupesoliai Sailele Malielegaoi, i le tulai mai o ia faletupe ma nisi o ofisa ma pisinisi e faamaopoopo le faatuina mo le taimi muamua o se komiti o mavaega e vaaia foai tupe mai tagata.
O lona uiga o se komiti o le a galulue faatasi ma le Malo i le lumanai mo le tagofia o ni galuega e faatino e fesoasoani atu ai i tagata e aafia i ni faalavelave faafuasei ma mala faalenatura. O tupe uma o le a teuina i teugatupe o le a faailoa i le atunuu. O le a sueina foi tupe ma faailoa faamatalaga i le faaaogāina e pei ona aofia i le komiti o mavaega ma le pisinisi tausi tusi ma suetusi o le Betham and Company.
E tasi le masina ua tatala ai teugatupe i faletupe e fā i Samoa e pei ona ta‘ua atu, e ave sa‘o i ai seleni ma foai mai tagata. Faaalia e Tuilaepa ua a‘e se finagalo e faatuina se komiti o mavaega poo se trust, ona o nisi o tagata mai fafo ua valaau atu i le Malo pe iai se mea e aumai i ai a latou foai mo pisinisi na aafia i le mu o le maketi i Savalalo.
O le finagalo o le Palemia e iai ona atugaluga i faalapotopotoga i Samoa o loo ofoina fesoasoani poo charity organizations, ona latou te lē tausisia taiala o pulega lelei i le faamaumau o tupe mai foai faameaalofa, aemaise o le sueina o faamatalaga uma o le faaaogāina o tupe.
O le mafuaaga lea o lona fiafia i le komiti o mavaega ua faatuina auā o le a latou faamaumau uma seleni ma suesue lelei le faaaogāina ona faasalalau ai lea i le atunuu atoa mo le silafia o le faaaogāina o tupe, ma le aofaiga o seleni e maua.
O se itu sili lea ona tāua i ni taumafaiga faapenei e pei ona saunoa le alii Palemia i le feiloaiga na sainia ai le maliega poo se memorandum of understanding i le va o faletupe e fā, ma sui o itutino o le a latou galulue faatasi. O le Pulega o tagata tafafao le Samoa Tourism Authority, o le isi lea sui o le komiti.
