O le lakapi i le taitoa 10 (10 a side) lea na amata ai taamilosaga o taaloga lakapi a le Itumalo o Aana i le Aso Toonai na tea nei. O se taumafaiga ua amatamea ai lenei Iuni Lakapi ona o le manatu e manaia foi le agai i lea taaloga a o lei amata lelei le taamilosaga o le taitoa 15.
O le tausaga lenei ua lē amata faatasi taamilosaga a Iuni Lakapi a le atunuu. O lea na faatoa amata le taamilosaga a le Iuni Lakapi a Apia Sisifo latou i le lua vaiaso talu ai.
O le Iuni Lakapi a Apia o lea ua leva ona faagasolo ana foi taamilosaga pe sili atu ma le masina talu ona amata faatautaia ae o le Iuni la lea a le itumalo o Aana lea faatoa amata i le Taamilosaga o le Taitoa 10 ae ua lē amata sa‘o i le taitoa 15.
O le faamatalaga a le Peresetene ia Afamasaga Rico Tupai, e mae‘a loa le Aso Toonai na se‘i mavae atu nei, sauni loa lea o kalapu eseese i le unai o le taitoa 15 o lenei tausaga.
O le alii Palemia na faapea ona tatala aloaia lea taumafaiga ma le faamoemoe e unai taaloga o le lakapi i Iuni nei e i afioaga i tua ona o le taulai lava sa iai i le filiga o ‘au a le atunuu i tausaga ua mavae, sa tele lava i le Iuni lakapi a Apia ma le Iuni Lakapi a Apia i Sisifo lea sa faaigoaina i tausaga ua mavae o le Iuni a Malisi.
O le Iuni lenei ua aofia ai Leulumoega, Fasitootai, Fasitoouta, Satapuala, Tufulele, ma isi afioaga i totonu o le itumalo, ma o le tasi lea o Iuni e tu malosi mai lava i tausinioga i le sailiga o ‘au a le atunuu i tausaga uma.
O le auai atu o le Taitaifono o le Iuni Lakapi a Samoa i lenei faatasiga na manino le faafiafiaina ai o le Itumalo ona o le amanaia o lea Iuni i ana taumafaiga o lenei tausaga ma o le faamalosi lava foi lea na ave i ai e le taitaifono, le alii Palemia, ina ia faaaogā lelei le taleni ia i latou ua maua le tomai i le lakapi ae lē o le faaaogā sese le malosi i auala e lē talafeagai ma le tulafono.
O lenei taamilosaga na faapea ona ave i ai le lagolago a le Kamupani telefoni o le Bluesky Samoa e ala i faailoga mo ‘au faamanuiaina.
