Tatala Sosaiete o le Fotu o Malama i Aukilani

E latalata i le 30 faiaoga Samoa o loo galulue i totonu o Kolisi maualuluga i Aukilani faatasi ai ma faiaoga Samoa o loo galulue i totonu o Iunivesite ua latou faatuina ma fausia se faalapotopotoga poo se Sosaiete ua faaigoaina o le Fotu o Malama.

O le Fotu o Malama, o se amataga fou poo le amata mai o se malamalamaaga, auā e oo mai loa tamaiti i le Kolisi ua ese foi le tulaga ma le laasaga o le a oo i ai le tamaititi aoga. O isi tamaiti na iloa le gagana Samoa i le Bilingual, o isi e mai Samoa a o nisi o tamaiti e matuā lē iloa ma le faasamoa.

Ae pei o le Vasega 9 i totonu o Kolisi o le a toe amata lelei ai le fausaga o le gagana ma le aganuu. Auā afai o loo iai le tamaitiiti i le vaega o tamaiti faatoa amata, ona alagatatu ma talafeagai lelei ai lea ma le polokalame o le Fotu o Malama, ae a sau o loo lelei le gagana Samoa e mafai foi ona fesoasoani i ai lenei Sosaiete e faalautele le iloa i le gagana Samoa.

O le afiafi o le Aso Faraile na tatala aloaia ai lenei faalapotopotoga i le Kolisi o Magele. Na auai le afioga i le Konesula o Samoa ia Faolotoi Reupena Pogi, Tofa Su‘a William Sio le faipule o Magele, le tamaitai ia Jenny Salesa le faipule o Manukau East faapea nisi o malo faaaloalogia sa latou molimauina lea afiafi tāua.

Na faatasi atu ai foi le failautusi o le FAGASA le susuga ia Faatili Iosua Esera. O le susuga i le faafeagaiga ia Rev Dr Peniamina Leota o le Ekalesia EFKS i Grey Lynn, na tatalaina le faamoemoe i le sauniga lotu ona saunoa lea o le fofoga o le po le susuga ia Lemoa Henry Sevesi Fesuluai e faafeiloai le mamalu o le auvalaaulia, ma alo ai loa i le ‘ava faatupu o le feiloaiga.

Na sosoo ma le saunoaga autu o le afiafi lea na saunoa ai le afioga i le Konesula ia Faolotoi Reupena Pogi i le aano moni o le Fotu o Malama, i lona aotelega o le faaaupegaina lea o faiaoga mo le siitia o le aganuu ma le gagana Samoa i Kolisi ma Iunivesite, i le soosoo tau‘au ai ma mātua i ekalesia ma matagaluega o aoga uma ma isi o faipaaga faatasi.

O lona agaga faafetai i le tofa ua a‘e, ia i latou ua taulamua i lenei faamoemoe faatasi ai ma lana faamanuiaga i le Sosaiete ina ia manuia le agai i luma o ana polokalame faagasolo i le lumanai.

Na ia faamamafaina foi le tāua o le talanoa i le Gagana Samoa ma Faitau le Tusi Paia. Auā o Samoa e faavae i ana tu ma aga ma le faakerisiano.

O lou toaga foi e tautala faasamoa e vave ai ona e malamalama i lau aganuu, o le toaga foi e faitau le Tusi Paia e fesoasoani ai i lou ola faaleagaga.

O le Tofa Su‘a Williama Sio na saunoa e tatala aloaia le faavae, lea na ia ta‘ua ai, e iai le mafuaaga e falala ai lau o le niu ona ua tele matagi ua agi mai, e ala i suiga eseese ua iai lenei vaitau o le lalolagi.

Ona tatalo lea o le susuga i le faafeagaiga ia Rev Dr Peniamina Leota e faapaia le faavae. O le afioga ia Tofilau Siliva Gaugatao o le peresetene o le Fotu o Malama na saunoa e faamalamalama nisi o taiala o le sosaiete. Ia galulue faatasi ma le matagaluega o Aoga, ma isi matagaluega ina ia ausia le moemitiga ua mae‘a ona faataatia e le ofisa o aoga aemaise o ni sini ma taiala ua uma ona fuafuaina e aoga Pasefika (2013-2017).

O le alii aoga o Paramata Savea Toleafoa na fai ma sui o fanau aoga o le Kolisi o Magele e tautalagia le tāua o le agagana Samoa o loo ia aoaoina mai lava i le Vasega 9 seia oo i luga i le Vasega 13, ma ua iai foi lana moemitiga na te faaauauina pea lea mataupu pe a taunuu i le Iunivesite.

Na sosoo ma le ipu ti na saunia e le Fotu o Malama ma saunoa ai loa le tofa ia Tauanuu Perenise Tapu e momoli le agaga faafetai i le paia o le auvalaaulia na autovaa atu e molimauina lea faamoemoe faatasi ai ma meaalofa na saunia mo malo faaaloalogia.

Tofiga o le Fotu o Malama:

Taitaifono – Tofilau Siliva Gaugatao

Sui Taitaifono – Toesulu Brown

Failautusi – Lemoa Henery Sevesi Fesuluai

Sui Failautusi – Caroline Harris

Teutupe – Melegalenuu Ah Sam

Sui Teutupe – Aumua F Samuelu