Tatala se faletalimalo fou i Lefaga

Ua iai nei se atina’e tele ua tatala i le afioaga o Matautu Lefaga. O se faletaimalo tu matafaga, ua tuufaatasi ai le sao o ni faipisinisi mai i fafo, ae faapea foi Samoa nei. O lenei galuega sa le tele se faalauiloa i lona fausia ae ona pau le tulaga mautinoa ua toe faaolaola ai se tasi o mataaga o Samoa na faalauiloa ona o ata tifaga, e pei o le ata lea ua faaigoa ai lea atina’e o le Return to Paradise.

O se ata o le vaitau o le 1952 na faapea ona autu i se alii fai ata tifga lauiloa o Amerika i ia vaitaimi o Gary Cooper le ata o le Return to Paradise. O le igoa foi lea o le faletalimalo fou lenei lea e tusa ma le 60 fale ua fausia ta’itasi aemaise o isi potu tetele faaopoopo.

O le alii Palemia le Susuga Tuilaepa Lupesoliai Sailele Malielegaoi na saunoa faapitoa i lenei faamoemoe ma na ia ta’ua o le nofoaga lenei ua tele taumafaiga a isi fai pisinisi ina ia atia’e peitai na ia faaalia o lea faato’a maua tonu tagata e tatau ona faatinoina lenei galuega. E to’atele faipisinisi o loo i totonu ma fai sea i lenei galuega tele ma na ia ta’ua o le atina’e ua faia i Lefaga o le a manuia ai lava tagata o Lefaga. E le gata foi la i tagata faipisinisi i Samoa nei e iai foi i latou na faapea ona agai mai mai i fafo aua lea lava atina’e.

Na iai se mataupu na laga e le alii Palemia faatatau i mataaga tu matafaga, o le tapa lea o tupe i taimi uma e afea ai nofoaga faapenei ma na fautuaina e le alii Palemia e taofi lea tulaga aemaise lava i nofoaga faapenei e mautinoa lava le tele o le tupe a le nuu o loo maua mai ai i faletalimalo faapea. Sei vagana o matafaga lava ia e afea i tafaoga ona tau tala tuu mai lea o le faia o lea tulaga o le tapa o tupe o taavale o loo agai i totonu o nei nofoaga mo tafaoga, ae o le fai o le faletalimalo toe tapa atu ma le tupe, ua faaalia e le alii Palemia e tatau ona toe silasila iai.Se vaaiga i foliga lalelei ua iai nei le faletalimalo o le Toe foi i le Parataiso

Se vaaiga lena i le taimi ao laulaututu le mamalu i le auvalaaulia mo le tatalaina o le faletalimalo