O le a tatalaina i le amataga lava o le tausaga fou, pe a toe amatalia aoaoga masani, se isi polokalame fou tau aoaoga ua faaigoaina o le Pacific Peoples Advancement Trust (PPAT).
O lenei vaega o loo faauluulu i sui o toatolu o le Komiti Faafoe (Trustees), e pei o le alo lauiloa o Samoa i taaloga, le afioga Laauli Savae Michael Jones (Chairman and Founding Trustee); o le susuga Hamish Crooks (Trustee), ma le tamaitai Tonga o Emeline Afeaki-Mafile’o (Trustee).
O lenei faalapotopotoga, e afua mai lalo o le faamalu o faalapotopotoga a le Pasefika, o loo taulai atu i le unaia pe faagaeetia tupulaga talavou a le Pasefika, ia ausia ni moemitiga ma nisi tulaga lelei e mafai ona latou ausia i le soifuaga, e faaaogā ai polokalame ma poloketi a le aoga mo le atinaeina o tomai tau tamaoaiga ma atinae o aga fesootai.
O lenei polokalame na faavaeina i le tausaga e 2005, ma sa tele lava isi polokalame ma poloketi eseese na amatalia ai i le galulue faapaaga ma nisi o faalapotopotoga, aemaise lava o le taulaiga sa agai pea i fanau talavou ina ia aoaoina ma tomatauina o latou olaga.
Ae o le tausaga fou la lea ua fuafua nei o le a amatalia aloaia ai sa latou aoga e pei ona fuafua e tatala ai faitotoa i le aso 6 o Fepuari 2015.
O le a amata muamua i vasega Year 11 lea e agavaai i ai fanau talavou mai le 14 ma le 15 tausaga le matutua, ae iai le faamoemoe e mulimuli ane o le a faasolosolo atu lava i isi vasega i luga atu, pe a solosolo lelei lava fuafuaga uma.
O le alo o Samoa, le susuga ia Falefatu Enari o le a avea ma puleaoga ma lagolago atu i ai lona faletua ia Perehuia Enari, i le faatinoina o polokalame o lenei aoga fou.
Ae o le Aso Tofi nei la i le itula e 7pm i le afiafi, i le tuatusi: 42 Atkinson Place i Otahuhu, o loo valaaulia ai le mamalu o le atunuu, i mātua faapea alo ma fanau o loo fia manaomia nisi toleniga atili tau aoaoga, o le avanoa lelei lenei e faafofoga atu ai i nei foi tamafanau a le Pasefika, a o latou faamatala auiliili mai vaega eseese o a latou polokalame o le a faatinoina ai i lenei aoga fou.
O se avanoa lelei lenei e toe tapue ai nisi tomai fou o fanau talavou pe afai sa faaletonu le tulaga o aoaoga muamua, ae o le taulaiga a le Pacific Peoples Advancement Trust, ia toe maua e talavou uma se avanoa lona lua e toe faaleleia ai le olaga aoaoina, auā le agai i luma o le olaga ma maua tomai e aogā mo le sailiga o ni galuega lelei.
