O le aso faapitoa mo le faalauiloaina o fuafuaga ma ituaiga aoaoga eseese a le Iunivesite a Massey i lona lala i Albany, sa molimauina le tumutumu i ai o tagata i lenei tausaga.
O tausaga taitasi e molimauina ai pea le faatupulaia o i latou e asiasi ma agai i ai. Peitai ua sili atu ona faatoateleina le faitau aofai o tagata asiasi i lenei tausaga.
O le Aso Toonai na tea nei, aso 12 o Me sa tatala ai le lotoā i Massey mo le faalauiloaina o mataupu, atoa ai ma le feiloai ai ma le mamalu o tagata lautele. O le tasi lenei o Iunivesite, ua faamaonia ma molimauina le toatele o tamafanau a Samoa, ma tagata Pasefika sa aotauina ai i matata ma mataupu eseese.
Ae o tapenaga a le komiti faavae, ma le pulega a le Iunivesite mo le tausaga nei 2012 agai mo le lumanai, ua matua faateleina ai foi ma faaopoopoina nisi courses poo mataupu fou i lana auaunaga.
E tele polokalame faaleaoaoga ma saunoaga sa saunia ma tapenaina e nisi o iai agavaa faapitoa i mataupu e uiga i Pisinisi (Bussiness), Creative Arts, Education, Humanity, Social Sciences ma le Science.
O ia tapenaga uma, sa fesoasoani tele mo le toatele sa agai ane, ina ia fai ma taiala e taulai i ai mafaufauga ma filifiliga, i mataupu ma agavaa tonu o le a toe aoaoina ai mo le lumanai.
O i latou mo tomai faapitoa i galuega faainisinia mo galuega tetele, aemaise le fafauina o faavae ma ata o fale, faleaoga, ma auala tetele, sa auai foi i lea aso tele o le Iunivesite. O nisi o i latou, o ni tagata tautaua tele i o latou agavaa ma tomai faapitoa i galuega faainisinia, ma sa auai i se tauvaga tele a le lalolagi sa faia i Amerika. Sa auai foi nisi popoto faapitoa i musika, ma le faaaogaina o ituaiga meafaileo, ma meafaitino e faaaoga i faili, musika ma pese.
O le Aoga poo le New Zealand School of Musics Jazz, sa faatautaia se aoaoga i le faaaogaina o laau e pei o piano, kitara, bass ma tagipalau.
O fesili ma tali i mataupu e aofia ai mea tautupe, galuega fesoasoani lautele (social work, social policy, and social anthropology), sa faapea foi ona iai tagata faapitoa mo ia mataupu sa feagai ma nafa ma le faamalamalamaina o faamatalaga e uiga i ai.
O faamatalaga e uiga i galuega faatausimai, ma le tausia o le soifua maloloina e ala i taumafa paleni mo le tino ma le mafaufau ia malosi pea, sa saunia foi i le aufaigaluega ma faiaoga faapitoa o ia foi agavaa tāua.
O le agaga maualuga lea ma le autu tonu o le aso faapitoa, ina ia mafai ona silafia ma faalauiloa faalauaitele, mataupu uma ma polokalame o loo aoaoina i le Iunivesite, mo le silafia e tagata lautele.
E le gata i lea o le faia o faatosina, ina ia gagau ai le augata, ae faatupu manatu ma toe faafoi mai le fiafia o le toatele, ina ia toe faia nisi aoaoga, a o maua le avanoa.
E le gata ina penefiti ai tagata lautele, ae sili ai foi ona manuia le Iunivesite, i le tulaga o aoaoga ma le poto salalau ina ia faaaoga tatau avanoa ma faiaoga ua mae‘a ona aoaoina mo galuega lelei ma le tāua.
O le susuga ia Ben Taufua, o le alii pule i le tulaga o fesootaiga ma le vaaia o tamafanau a le Pasefika i nofoaga e lua o le Iunivesite i Albany ma Palmerston North, sa nafa ma le anoano o matata eseese, ma le faafoeina o nisi o polokalame pisi i lea aso.
