E lei faigofie ona talia ele aulotu PIC i Otara le lauga mulimuli ale latou tamā faifeau ia Rev Aotofaga Lemuelu, i lana pulelaa ile malumalu ole ekalesia PIC i Otara ile taeao Aso Sa 4 o Fepuari.
Ole lauga lea ua famavae aloaia atu ai le tamā faifeau i lana aulotu e tusa ai ma le latou mafutaga sa latou galulue faatasi mai ai ile 28 tausaga ma masina e iva a’o avea ia ma faifeau i totonu ole ekalesia i Otara.
Ole tumutumu ole malumalu i lea taeao na vaaia ai loimata ole alofa ile misia ele ekalesia o si o latou tamā, ona o ona uiga tausaafia ma uiga mālie faagalo gata ole toeaina. Ole mālie o uiga ole faifeau i nisi o taimi, nate faaaogāina e momoli atu ai le feau e ala ile Talalelei ale Atua i loto ma agaga o tagata.
Ina ua saunoa le faafeagaiga ia Rev Aotofaga Lemuelu i lana ekalesia o ia ole a faamavae ma le galuega, e lei faigofie ona talia ele aulotu lana saunoaga, ona ose tamā ua mafanafana le mafutaga ma lana ekalesia ae ole a misia foi ona uiga tausaafia ma le mālie ile tele o taimi.
Ole tausaga 1989 na osi ai le feagaiga ale aulotu PIC i Otara ma le susuga ile faafeagaiga ia Rev Aotofaga Lemuelu ma le faletua ia Gafatasi Lemuelu, ma le tuutuuga o lenei feagaiga, faatoa tatala lava le feagaiga pe a finagalo iai le faifeau ma lona faletua. Peitai ane ole tausaga 2009 na valaauina ai ele Atua le soifua ole tina ole galuega ia Gafatasi Lemuelu, ona faaauau toatasi mai lava lea ele tamā faifeau le galuega seia oo mai lava ile taimi nei.
Ole tele o taimi na fesiligia ai ele matagaluega le aulotu i Otara ile latou mafutaga ma le faafeagaiga, ona o lea ua leai se faletua, ua matua foi lona soifua ae le gata i lea ua gasegase foi, ae sa lē mafai lava ona maluelue ai finagalo ma loto ole ekalesia, sa latou taofiofi mamau lava ona ole silasila ma le manatu i upu ole osigafeagaiga e pei ona iai.
Ua 28 tausaga ma masina e iva le umi ole mafutaga ma ua faafaigata foi ona momotu auā ua pele ma mafanafana mea uma ile alofa ole Atua. Ua 75 tausaga le matua ole soifua ole susuga ile faafeagaiga ia Rev Aotofaga Lemuelu ae mautu loa lana filifiliga ua tatau ona faasee tuagalu mai le galuega ale Atua ona ua matua foi lona soifua.
Ole Aso Toonai 3 o Fepuari na feiloai ai loa le ekalesia PIC i Otara ma susuga i faafeagaiga ma faletua faapea aulotu taitasi ole matagluega, e molimauina le tuua aloaia ai ele toeaina ia Rev Aotofaga Lemuelu ole galuega ale Atua i Otara faapea le matagaluega ae malolo.
Ole aso foi ua faafesagai ai aiga na lua ma le ekalesia i tu ma aga masani a le atunuu i aso faapenei. Ua sasaa le valevale alofa ole matagaluega e ala i meaalofa tupe ua foaiina aemaise ai o aiga ma uo ale ekalesia. Ole afioga ia Fepuleai Semau ole aao tusitusi lea ole ekalesia i Otara sa fai ma tootoo ole ekalesia, e faafetaia le agalelei o aulotu taitasi ole matagaluega aemaise le faafesagaina ma aiga na lua.
Ua molimauina foi le tele o faafiafiaga ale autalavou e momoli ai o latou alofaaga ma faamanuiaga ile latou tamā faaleagaga. Ae ole maualuga ole aso o tapenaga matagofie na ‘au’au iai le mafutaga a tina ole ekalesia faapea le komiti faapitoa o tapenaga uma oloo taitai ai le afioga ia Sala Alatise Amosa.
Ole Aso Asa na aloaia ai loa le tatalaina ole feagaiga ile va ole aulotu PIC i Otara ma le latou tamā faaleagaga ia Rev Aotofaga Lemuelu.
Ole susuga lava ile faafeagaiga na ia taitaiina le sauniga ma le faamanatuga. O ana upu mulimuli i luga ole pulelaa na ia faafetaia ai lana aulotu, aiga faapea aulotu ile itu Niue ma Rarotonga sa faatasi atu e tusa ai ma le latou mafutaga ile tele o tausaga ma masina. Ua oo lava i fanau laiti na afea lava ile saunoaga faafetai ale tamā ona ole latou foi galuega i totonu ole autalavou a’o mafuta ai.
Na faaiu le polokalame ole Aso Sa ile toonai tele ale ekalesia ma aiga na lua, ma faauma ai loa upu mulimuli ma upu taumavae e pei ona tatala ai le ie ole malo e faailoa ai ile tu ma le aganuu a Samoa ua tatalaina le feagaiga faatasi ai ma le meaalofa tupe, na molimoliina atu ile aiga ole susuga ile faafeagaiga. Ole afioga lava ia Fepuleai Semau na tu totoo ile ekalesia e faaiuina le faamoemoe ole tatalaina ole Feagagiga ale faifeau ma lana ekalesia.
Tofi ole Aulotu:
Failautusi – Fepuleai Semau
Sui Failautusi – Muagututia Saipele
Teutupe – Faauliuli Schmidth
Sui Teutupe – Afuvai Vavau.
