O le afioaga o Faleapuna e tele ona pitonuu ma e fā lelei vaitaele o loo iai. O le vaitaele e ta‘ua o le Punalei i se tasi o ia pitonuu, ua faapea ona tatala aloaia i le vaiaso na tea nei.
O se galuega na mafai ona faatino ona o se tinoitupe na maua mai i le faalapotopotoga o fesoasoani mo tagata lautele o Samoa le CSSP e pei ona silafia ai.
O le faamatalaga na ta‘ua e sui o le CSSP, o soo se faalapotopotoga lava e iai ni manaoga e faatino atinae i totonu o le nuu, ua faapea ona talosaga atu e suesue lelei lava ma o le tulaga foi lea na iai le talosaga lenei ona o le vaitaele ua tele ina faaleagaina ona o afā o tausaga ua tuanai.
Na asia e le CSSP le vai ma faamautu ai loa le ioega o le toe fausia o lenei nofoaga faitele mo lea itu o Faleapuna. O le komiti a tina o le pitonuu lenei na faatoai le latou talosaga ma e $40,000 le tupe na avane e le CSSP faaopoopo i ai ma le $4,000 tala na faapea ona faatupe e tina o le mafutaga.
O le alii Palemia na tatala aloaia lenei gluega ma ia fautuaina ai le komiti faapea le afioaga e lē tatau ona gata ai i le vaitaele atinae e talosaga ai i le CSSP.
O faalapotopotoga nei na ia ta‘ua ua faaauala mai ai le fesoasoani mai i fafo ua mafai ona faatino a latou galuega fesoasoani ona o fesootaiga ma le Malo o Samoa ma o le autu lava lea o le latou unai ina ia mafai ona maua mai fesoasoani mai i fafo e fesoasoani i atinae o afioaga eseese i totonu o le atunuu.
O le faamalosi ma le lui a le alii Palemia, ina ia faaaogā lelei avanoa nei mai i atunuu mamao e faatino ai atinae i totonu o nuu.
O se aso tāua tele lenei i le komiti o tina a lenei vaega o Faleapuna ma na o latou ta‘ua o le agai mai ai i tausaga ua mavae sa faapea lava ona vaai e le pitonuu latou le latou vai ma o se fiafiaga tele le toe vaaia o foliga lalelei o lenei atinae a le nuu.
Ua faapea foi ona iai se fuafuaga a tina o le mafutaga lenei e talosaga mo le fausia o se fale komiti a lea lava itu o Faleapuna.
