Sui ole Pulega ale Emerge Aotearoa Ltd faapea sui ole Faafaletui

Sui ole Pulega ale Emerge Aotearoa Ltd faapea sui ole Faafaletui

Sa tatala aloaia le faaaogāina ole polokalame Pasefika ua ta’ua ole “Peau Folau” (Voyaging Waves) ele auaunaga ale Emerge Aoteroa Ltd. ile Aso Lulu, aso 31 o Ianuari.

Ose auaunaga ua faapitoa ile soifua maloloina lelei faalemafaufau poo le Mental Health i Niu Sila.

Ole susuga ile faafeagaiga ia Rev Ionatana Pouli Lefale na ia tatalaina lea polokalame ile tatalo, ile MIT Pasifika Community Hall i Otara. Na tumutumu lea hall ile mamalu o Samoa ma tagata eseese ole Pasefika, aemaise ole aufaigaluega Pasefika ma le pulega ale Emerge Aotearoa Ltd, e molimauina lea faatamasoaliiga e pei ona saili malo ai nisi o tamafanau ole atunuu.

Ole Peau Folau ole igoa lea ale Pasifika Evaluation Tool ua faaigoaina ai, ma sa amataina ma tuufaatasia ele faletua ia Rufo Tinai Pupualii, faatasi ai ma le faufautua ale susuga ile faafeagaiga ia Rev Ionatana Pouli Lefale faapea le faufautua ale Faafaletui Advisory Group Emerge.

Ole Peau Folau ose igoa na sailiili iai le faletua ia Rufo Tinai Pupualii ina ia mafai ona fesootai ai tagata uma ole Pasifika, e afua mai lea igoa ina ua toe to manatu le faletua ile ata foi lea ia Moana lea sa faaaogaina ai folauaga o tagata Pasifika.

Ole Moana la oloo mafai ona fesootai ai lea motu ma lea motu ole Pasifika e ala i auala o folauga. Ua lē faaaogāina la ele faletua le Moana o Faolauga e faaigoa ai lenei polokalame ae ua ia aumaia le Peau o Folauga lea ua faapuupuu nei ile Peau Folau.

Ole faafaletui Advisory Group i Aotearoa o i latou ia sa latou iloiloina le igoa lea ua faaigoaina ai lenei polokalame po ua talafeagai lelei le igoa, ole uiga ma lanu. Ole faafaletui lea oloo auai ai sui mai Cook Island, Niue, Tonga, faapea sui o tagata Pasefika sa fananau i Niu Sila e aofia ai Ueligitone, Kalaiesetete, Whangarei, Waikato, ma sui mai i Aukilani lea e numera tasi ai Samoa auā e toatele Samoa oloo aumau ai.

Ua fitu nei masina talu ona faavae mai lenei polokalame ole Peau Folau ele faletua ia Rufo Tinai Pupualii a’o lea faatoa tatala aloaia ile faaiuga ole masina o Ianuari. Ole aloaiaina ole tatalaina o lea polokalame ina ia mafai ona faaaogāina ele Emerge Aotearoa Ltd e fai ma taiala o galuega faapasefika auā le vaaia lelei o tagata Pasefika oloo gasegase ile mafaufau i Niu Sila. Na taualauga polokalame ole aso i faafiafiaga matagofie mai Cook Island ma faaiu ai loa ile taumafataga ma tatala ai loa le filialii.