Na lolofi atu le motu o tagata se‘i molimauina le aave mai o tala i se pisinisi fou ua faatūina nei i le aai o Goodna. O le isi tulaga ofoofogia ona o le manaia ma le talafeagai o le tulaga o le tautua ma le nofoaga e faigofie lava ona uia e le toatele o tagata.

 
Na tatalaina aloaia i se tatalo amata ma faagasolo ai polokalame o le aso. O lea auaunaga o loo faatautaia e le tofa ia Alofipo Vaea Lang Siu mai Tulaele ma Saleaula ma le tausi ia Janet Lang Siu mai Vailima, Sinamoga ma Leauvaa. O loo faatauina ai oloa masani e pei o meaai tuuapa ma fua foi o faatoaga, aemaise meaai a tamaiti faapea isi oloa e pei ona masani ai faleoloa i nuu i tua ma le taulaga.

 
E lē gata i lea ua faatauina ai foi kuka eseese auā le fofoga taumafa o le atunuu. E iai foi le latou auaunaga mo le lafoina o tupe i Samoa ae tala ia Aliki ma fai ai faatau a aiga i Samoa. Sa iai nisi o oloa sa faapa‘ū i le aso na tatala ai lenei auaunaga, ma le bbq sa foai fua ia i latou uma sa auai i le Aso Toonai ua tuanai.

 
Sa lagona le agaga faagaeetia o le susuga i le alii pule ma le faletua ona o le silasila atu i nai tamā ma tina matutua ma le mamalu o le atunuu sa gasolo atu ma faaaogā lumafale e nofonofo ai ma taumafa ‘ava Samoa ma sina iputi i le mālū o le ea o lea foi vaega o le aai o Goodna. E iai le naunautaiga o le tofa ia Alofipo Vaea ma Janet ua faatulagaina nei laulau e lē gata mo tagata lautele ae o le a ia ofoina foi ni nai ‘ava Samoa e fai ai faafaletui a nisi o matai e maua le avanoa e asiasi atu ai i le faleoloa.

 
O taimi tatala o le auaunaga o le Aso Gafua e oo atu i le Aso Faraile i le 6:00 i le taeao seia oo i le 9:00 i le afiafipo ae lē tatalaina le faleoloa i le Aso Sa. E te maua le “Lang Siu’s on Layard) i le numera 9 Layard Street i Goodna.

Nisi o le atunuu sa molimauina le tatalaina o le faleoloa o le tofa ia Alofipo Vaea ma le tausi ia Janet Lang Siu i Goodna

Comments

comments