Tatala le Ofisa ole Samoa Airways ile Fale o Samoa i Magele

Susga ile alii pule ia Mailo Tautiaga, Heseti Tolai, ma Dwayne Bentley aufaigaluega ale Samoa Airways
Susga ile alii pule ia Mailo Tautiaga, Heseti Tolai, ma Dwayne Bentley aufaigaluega ale Samoa Airways

Ua pepese fiafia le mamalu ole atunuu  oloo aumau i itu e fa o Aukilani ina ua agina le tala ua tatala le ofisa autu ole Samoa Airways ile fale o Samoa i Magele. Ua lē toe iai se popole poo se tau saili ose telefoni e tagata ole atunuu e fesootai ai ni avanoa e malaga ai i Samoa ma Ausetalia, ina ua tau lau ole faamoemoe ole kamupani vaalele ole Samoa Airways ile fia maua lea ose ofisa autu i Magele ina ia faamautu ai ana galuega faatino.

Ole Aso Lulu ole vaiaso ua mavae 14 o Fepuari na tatala ai loa le ofisa fou ale Samoa Airways ile fogafalelua ole maota o Samoa i Magele, ma ose fiafiaga sili ma le loto faafetai ile alii pule ia Mailo Tautiaga ma le aufaigaluega ona ua vave tali mai le ofisa ole Konesula i Magele ile faamautuina lea ose ofisa ale kamupani vaalele ina ia faafaigofie ai ona faatino galuega mo le atunuu.

Ua tau fai malaga mai itu e fa o Aukilani ile lagolagoina ole kamupani vaalele a Samoa, ma ua le malolo ai le aufaigaluega i aso uma talu ona tatala le ofisa autu. O ofisa oloo iai nei ile fogafale lua ole maota o Samoa, oloo faaaogāina ile taimi nei auā le taliaina o manaoga ole atunuu, ae ole faaiuga o Mati lea ua faamoemoe e faaaogāina ai loa ana ofisa mautu ale kamupani vaalele ile fogafale pito i lalo ale maota o Samoa.

Ole tulaga lelei o lea nofoaga ina ia faafaigofie ai ona feoai nai tamā ma tina matutua oloo agai atu mo ni mataupu aemaise ole totogiina o pasese. E toalua le aufaigaluega ale Samoa Airways mai Samoa oloo galulue faatasi ma le alii pule ile taimi nei le susuga ia Dwayne Bentley ma le tamaitai ia Heseti Tolai.

Ole vaiaso fou e toe taliu ai i laua i Samoa ae malaga mai nisi sui ole ofisa i Samoa e faaauauina galuega ile taimi nei seia mautu lelei le aufaigaluega i Niu Sila nei auā le tautuaina ole atunuu. Ole faaaogāina foi ole ofisa autu i Magele ole a tuufaatasi mai ai ma isi aufaigaluega e toalua oloo galulue ile call centre ile city ina ia faafaigofie ai galuega uma ale kamupani. Ole isi sootaga leleiole ofisa malaga a Samoa i lona ofisa fou i Magele, auā ua fesootai lelei ma le ofisa ole Konesula i Aukilani ile nofoaga oloo taulai uma mai iai fuafuaga ole malo o Samoa aemaise o tusifolau ma pepafanau.

Ole aso 14 o Novema ile tausaga ua mavae na amata tatala ai femalagaina ale kamupani vaalele fou lenei ale atunuu, ae sa faafaigata le tele o ana galuega ona ole leai ose ofisa autu.

Sa tele lava ina faaaogā le telefoni ale susuga ile alii pule ia Mailo Tautiaga e fesootai ai le atunuu mo le fia faia oni avanoa malaga, poo le valaau foi ile call centre ile city mo nisi o faamatalaga e uiga ile auaunaga ale Samoa Airways. Ile taimi nei ua faafaigofie mea uma ile atunuu, i femalagaa’ina ole sailia o avanoa aemaise ai ole faigofie foi ona saili le paka o taavale.

Oloo faaaogāina pea le telefoni 08005359726 e fesootai atu ai le atunuu faapea le telefoni feaveai ale susuga ile alii pule ia Mailo Tautiaga. E tatala ile 6 aso ole vaiaso mai le Aso Gafua ile Aso Toonai, ile 9am ile 4pm Aso Gafua ile Aso Faraile ae ole Aso Toonai 9am ile 12 ile aoauli.