Ua lē o Setema e pei ona sa lipotia muamua e tatala ai le maketi i Fugalei ma ona vaaiga fou ua iai nei, ae ua amata faaaogā ma tatala aloaia i le masina lenei o Aukuso. O le Aso Gafua ananafi, 18 o Aukuso 2014 na tatala ai ma umusa, ma ua sili atu ona tele poloka ua faaaogā e le aufaifaatoa ma pisinisi laiti.
O se tala fiafia lea mo le atunuu aemaise le aufaifatoaga, ma le aufaipisinisi faatau oloa gaosi poo meataulima eseese. Ua fetaui lelei le tatala o lenei galuega tele a le Malo ma le amata malaga mai o malo mai fafo ma lo tatou atunuu auā le vaiaso o le Teuila ma le fono a atunuu laiti tauatia‘e o le lalolagi. E 650 poloka ua faaaogā e faatau atu ai fua o faatoaga mai lava i talo, taamu, ufi, aufa‘i, manioka, ma isi taumafa o meaai aano, faapea fualaau ‘aina ma fualaau suamalie.
O le a faatau ai ma oloa taulima eseese aemaise o ietoga ma siapo o oloa sa masani ona faatau i le maketi sa iai muamua ae toe fausia faatele ma faamaualuga le faavae o le maketi fou ua iai nei.
O le maualuga o lona tulaga ua taatia mai ai le i se tulaga saogalemu mo oloa ma fua o faatoaga pe a oo ina loloto timuga ma aafia ai lea vaega maualalo o le taulaga i lologa ma vai e tafe mai alavai. O le a leai ni faleoloa e toe vaaia i le maketi lenei, peitai o lea ua faaalia e se ofisa sinia o le pulega o le maketi o loo silasila pea i ai mo lea tulaga i le lumanai.
E sefulu miliona le tau o le galuega lenei ua tele i ai faamatalaga ona sa fuafua muamua e fogafale lua, ae alu alu sau le isi faamatalaga ua tasi lava le fogafale e pei ona iai nei, ma o le a leai ni faleoloa laiti. O atugaluga o le Itu agai e pei ona faaleo e le taitai le afioga Palusalue Faapo II ona sa iai pisinisi laiti e pei o poloka sa faatau ai oloa e pei o lavalava ma teuga. O le finagalo o le Malo na agiga i le taimi na tala ai le maketi tuai, o le a toe fausia se maketi fou ma o le a toe foi uma atu i ai le aufaipisinisi sa faaaogāina, peitai o lea ua lē toe iai ia vaaiga.
Ua faaalia e le Palemia i se feiloaiga ma tusitala o le fuafuaga o le maketi ua iai nei, o le a sili atu ona lelei ma o le a sili foi ona malamalama ma iloa uma atu vaega o i totonu o le maketi nai lo le maketi tuai sa pogisa lea sa ia faamatala sa masani ona saofia ai solitulafono o le gaoi e le isi o oloa a le isi, a o le maketi ua iai nei e le toe tupu ai ia tulaga.
E taunuu atu le tusitala i le aoauli o le Aso Sa na tea nei a o lumanai le tatalaina o le galuega ile Aso Gafua o le vaiaso nei, o loo pa‘o lava alii kamuta ma inisinia faufale o le Konekarate mai Saina na fausia le maketi. O le vaega faatali pasi e lei mae‘a fale ae o le talitonuga e faaaogā lava le maketi ae faauma pea nisi o vaega o loo totoe.
