Sa leai se ao e punitia ai ave malolosi o le la, e leai foi se ua sa pa‘ū i le eleele i le Aso Toonai ua mavae, a o pepese fiafia le tina ia Tagataese ma le fanau, o aiga na lua, o uo ma ē masani i le fanuatanu i Waikumete e alaga ai le viiga o le Atua ina ua tatala le maa faamanatu o le tamā e manatua ai pea ana galuega lelei sa fai.
O pesega a le autalavou mai le Ekalesia EFKS i Blockhouse Bay na avea lea ma feau tau molimoli e faalototeleina ai pea le tina ma le fanau a o valavala ai ma le mafutaga ma le tamā i le soifuaga i le tino nei i le malaga a le maliu ma le oti.
O upu faamalosiau a le taitai o le sauniga ia Rev Sesera Tolovaa o le EFKS mai Blockhouse Bay, na faamanatu ai pea galuega lelei, tiute tauave ma uiga tausaafia o le tamā i totonu o le aiga ma lana ekalesia sa galue ai i Blockhouse Bay. Saunoa le susuga i le faafeagaiga e valavala i le tino i le soifuaga nei ae lē mafai ona mavae ai galuega lelei ma le tausaafia. O le tāua foi o le maa faamanatu o loo afifi ma momoli mai ai alofaaga ma faamanuiaga o le tina ma le fanau, ae toe fafagu mai ai foi ma galuega lelei sa fai ma ona uiga fiafia.
O le faletua ia Litara Tolovaa na aveesea le ie sa ufiufi ai le maa, a o Princess Rosetta Magele le alo laitiiti o le tamā na tagi ma taumafai e lau faamanuiaga ma alofaaga o loo tusia i luga. O le loimata alofa na avea lea ma asoa ma sulugatiti i fanau a o fai a latou pesepesega e aualofa ai i le tamā. Na tofu uma foi le fanau ma le tina ia Tagataese faapea le susuga i le faafegaiga ia Rev Sesera Tolovaa ma manulele papae na faalele i le vanimonimo a o tagi talatala Princess Rosetta ma faamatala le uiga o nei manu, o la‘u lupe ua lele, lele i le vao maoa, talofa e, i lou tamā Taliaoa ua ou lē iloa.
Na muamua lava faalele le manu a le tina ona taufai faalele uma lea o manu a le fanau ma le faafeagaiga.
O se vaaiga na sui ai foi le silasila a le toatele o i latou sa molimauina lea faamoemoe i le alofa o loo taoto i totonu o loto o le fanau ma le misia o le mafutaga, ma faaiu ai loa i le tatalo mulimuli a le taitai o le sauniga.
O le tofa ia Maulolo Laki Toevai sa fai ma sui o le tina ma le fanau faapea aiga na lua e faaleoina o se upu faafetai i le taitai o le sauniga ma le auvalaaulia i le fanuatanu, ma agai atu ai loa i le faleaiga o le Valentines i Lincoln Road mo le taumafataga.
O le fofoga o le aso o le afioga ia Namulaulu Solomona o ia foi sa fai ma sui o aiga na lua e tu tootoo auā faaaloaloga mo le susuga i faafeagaiga ma le Ekalesia i Blockhouse Bay faapea le auvalaaulia ma tatala ai loa le fili alii.
