Na maua se feiloaiga ma le susuga i le faafeagaiga taulagi ia Pastor Makisua Fatialofa i le vaiaso na tuanai atu nei, ma faatalatalanoa ai e tusa ma le anavatau a le Kolisi e pei ona valaauina ai o ia mo le aai o Melepone aemaise le Setete o Vitoria.
Sa ia saunoa ai i le ono tausaga talu ona faavae ma amataina le kolisi i le aai o Sini, sa fai lava ma afea e nisi o finagalo aemaise o ni valaau faaaloalo mai le mamalu o loo papaaao i Melepone, ina ia manatua ane e le pulega ma taitai si o latou setete.
Sa fai ma tau i ai talanoaga ma tomanatuga, peitai o se taimi o le tausaga na tuanai atu na ia lagona ai ua oo i le taimi atofaina mo Melepone. Na soalaupule ma le peresitene o le kolisi le susuga ia Pastor Aila‘ula‘u Faletutulu faatasi ma le pulega, ona tasi moemoe ai lea o lo latou talitonuga o le finagalo amiotonu lea o le Atua.
O le faaaliga foi lea a le taitai aoao o le Ekalesia AOG Samoa i Ausetalia le susuga ia Pastor Onesemo Pulepule, aemaise o le laulau ina ua tāpā so latou finagalo, ma amata faagasolo ai feutagaiga e pei ona ua faamautu o le Aso Sa nei, aso 8 o Fepuari o le a tatala aloaia ai le faamoemoe i le pitonuu o South Morang.
O le susuga ia Pastor Onesemo faatasi ma le susuga ia Pastor Makisua o le a tatala aloaiaina lenei finagalo faatino o le Atua, tainane le lagolagosua o nisi o faafeagaiga ma faiaoga, ma amata aloaia ai loa vasega faagasolo i le Aso Gafua e sosoo ai.
