Ole upu ale atunuu, ole fuata ma lona lou ole tai foi ma lona taaga… Ua mavae atu le 2016 e pei ona vaaia ai le tulaga ese na oo iai le faatofāla‘iga ale Radio Samoa e ala ile Walking Samoans e pei ona sau a‘i le fā tausaga ile tasi ole savali ae taualuga ile tausaga talu ai ile ono (6) kalapu savavali i totonu o Aukilani. Ae o lenei la tausaga 2017, ua faapea ai ona tauata‘i se tasi o faatofāla‘iga ua amataina nei, ma ua faaigoaina ole mafutaga ale au faitogalaau ale Pasefika (Pacific Gardeners).
Saunoa Teleiai Edwin Puni, o ia ole matuaofaiva o lenei taumafaiga, o ia foi ole faatonu ole Walking Samoans, “E iai tagata e fiafia e savavali, ae iai foi i latou e faalē fiafia ile savali ae fiafia e faamalositino (exercise) ile faiga o togalaau.” Ole Pacific Gardeners, ose taumafaiga ua tuufaatasia ele Eventpolynesia, ae ua tuu mai iai ma le lagolago ale Health Star Pacific, auā e pei ona saunoa le tamaitai pule (General Manager) ole Health Star Pacific, le tofa ia Togiaioatua Vaifagaloa Naseri, ia poo le afioga ia Galumalemana Vaifagaloa Naseri, “Ona ole laolao lea oloo tautua ai le Health Star Pacific, ole soifua maloloina, ole ala lea ole lē nofoa‘i ae tulai e lagolago i taumafaiga faapenei e pei ona amata mea mai ai le Eventpolynesia, ole faatāuaina ole soifua maloloina ae ole faatinoina o auala e atinae ma faatupulaia ai le tino malosi ma le soifua maloloina.”
Ole mafuaaga ole savali e lē o po se lilo, ole faamalosia ma le faatāuaina ole soifua maloloina, e ala ile faamalositino, ae ua saunoa le faatonu ole Pacific Gardeners, Teleiai Edwin Puni, “Ole isi lenei itutino ole soifua maloloina, e lē gata ile exercise e maua mai le faaafu ile faiga ole togalaau, ae o taumafa e maua ai le soifua maloloina, e maua uma mai i fualaau‘aina.” “E lē gata la ole a maualuga ai le mautinoa ole soifua maloloina ile aufaatasi ole taumafa i meaai paleni, le tino malosi e maua mai le savali, le fiafia e maua mai le fellowship ma le ausavavali, le fellowship ma le au faitogalaau, ae ole itu sili ona tāua, ole a ono maua ai nai seleni faasili poo se faamāmā avega i lau lisi faatau (shopping list) auā ole a leai se tupe e toe faaalu ile faatauina o fualaau‘aina auā ole a maua uma lava i tuafale.
Ile ma le isi itu, e ono maua ai foi ni nai seleni pe a faatauina atu, poo le avea foi ma sau Samaria Agalelei (Charity) pe a foaiina atu ini nofoaga oloo manaomia e pei o nofoaga o tagata matutua (retirement/elderly homes).
Ole Aso Tofi, 09 Fepuari ile itula e 9 ile taeao, ole a feiloai ai i latou uma e fia auai i lenei faamoemoe, ile Te Puke Hall i Otara, ile va ole swimming pool ma le MIT, e faatalanoaina ai le faasologa aloaia o lenei faamoemoe, auā o lea ua amataina i nisi o aiga, e pei ona iai ile tolu vaiaso ua tuanai. E talia soo se tasi e fiafia e fai togalaau i lenei feiloaiga, ole a maua ai faamatalaga, e pei o auala e fesoasoani ai le Pacific Gardeners, e iai le faatauina o laau toto (seedlings), ole tomai e faasoa, ma le oo atu o alii ofisa e faatino ma faasino le faiga ma le amataina o togalaau‘aina, aemaise i tulaga e pei o faalelei eleele, compost mix, ma isi vaega tāua e ao ona silafia. E lē manaomia se tupe e amata ai lenei faamoemoe, poo se lesitala e pei ole tele o nisi o taumafaiga.
Ua tapenaina uma ele Pacific Gardeners lea vaega, pau lava lau pitolaau, pe afai ole a e afio atu ma susū atu ma avea oe ma sui o lenei mafutaga, ole tapenaina o lou tuafale poo lou fanua, auā le oo atu o alii ofisa e faasino ma amata lau togalaau.
