“Ua Ta‘e Lo‘u Fatu”
E ui lava ina sui atunuu ma siomaga ua aumau ai nei, ae lē o suia ai le naunau pea o le Susuga ia Joe Failua, e fia faaaoga ma faalautele atili se tomai ua iloga ai foi lenei alo o le atunuu i nei vaitau o le soifuaga, i lona siufofoga malie i le itu tau musika.
O le afiafi o le aso 3 o Setema 2009, sa tatala aloaia ai le CD fou a le susuga a Joe Failua i lo latou lava aiga i Glendene.
O le susuga ia Rev. Tafesilafai Lavasii sa saunia se sauniga lotu puupuu e faafetaia ai foi le agalelei o le Atua ua taunuu manuia le galuega fitā. O le faletua ia Miriama Lavasii sa otiina le lipine, ma o aiga lava ma uo a le alii pese sa mafai ona auai atu i ai.
O le lagona lava sa faaalia e Joe, e le mafai ona faataunuuina ma faatauina atu lana CD ae aunoa ma le tatalo faamanuia a Susuga i faafeagaiga.
O lenei CD fou e 11 pese o loo iai, ma o ni fatuga e faatatau i le soifuaga nei ma le tamaoaiga, o mafutaga aemaise o pesepesega faaleagaga. O le pese ua faaigoa ai lenei CD, “Ua ta‘e lo‘u fatu” o se pese sa fatu agai i se tamaitiiti tauaso o loo fia maua se fesoasoani ae o loo molimauina e se tagata ma‘i poo se pipili.
O loo iai ma se pese e aualofa atu ai i le uo poo le Uso ia Toaletai David Tua auā le sauni atu mo lana fusuaga ia Oketopa nei.
O nisi fatuga e aoga mo faaevagelia ma tala o le Lotu Tamaiti. Sa auai ai foi le faletua ia Nana Pita Anae, o le auntie o Raneeta, le faletua o le alii pese.
Ua faatauina atu i le mamalu o le atunuu i soo se vaipanoa o Niu Sila nei. E aualofa atu foi lenei CD i ona mātua ia Taimalie Failua ma Iasinta Lemamea, uso, tuafafine, uo ma aiga uma lava. Saunoa Failua, “E faafetai foi i lo‘u toalua, ia Raneeta mo le lagolagoina o lenei CD. Ia faamanuia lava le Atua.”
