E oo mai ile taimi nei oloo faaleiloga lava lagona o nisi o matafale ole ekalesia EFKS Greenlane, ona ole faafuasei ona tatala ma faamuta le latou mafutaga male latou faifeau le susuga ia Rev Misikopa Loli ma lona faletua ia Tala.
“Oloo lelei lava mea uma i totonu ole matou aulotu ile va male faifeau ae ua faateia tele matou ile tulaga ua tulai mai”, o le saunoaga lea ase tasi o tamā ole ekalesia e lē o manao e faalauiloa lona suafa.
Na ia ta‘ua foi e leai lava se faiva e asa mase maumau, e lē faapea foi e sologa lelei mea uma e iai foi nai faafitauli laiti lava sa maitauina, peitai, o ia faafitauli sa fofo alamea lava i totonu ole ekalesia, ma e lē oni faafitaui foi e ono tatala ai le feagaiga male faifeau e pei ona tulai mai nei.
Na ia ta‘ua foi, ole Aso Sa 11 o Setema na susū atu ai le Toeaina ole Pulega e feiloai male ekalesia ma faailoa atu le faaiuga ale Autoeaiina, ole Aso Gafua e sosoo ai, ole a tatala ai le feagaiga ale latou ekalesia male latou faifeau.
Ole Aso Gafua lava na sosoo ai, na toe oo atu loa le Toeaina ole Pulega mole tatalaina ole feagaiga, peitai, e lei auai le susuga ile Faifeau ia Misikopa Loli, na ole tina ole galuega le faletua ia Tala male aulotu, sa iai ma faapea ai loa ona faataunuu le tatalaina ole feagaiga male aulotu.
Na fesiligia ele Samoa Times le susuga ia Misikopa mo sona finagalo, na musu le faifeau e talanoa auiliili mai ile faaletonu ua tulai mai ile latou mafutaga male ekalesia EFKS Greenlane, ae ose finagalo faaalia o lona faletua ia Tala e pei ona ia faailoa mai ile Samoa Times, “Ole taimi nei e lē o toe galulue ma‘ua ile ekalesia, e ese le tagata ua tofia e vaaia le ekalesia.”
Ole saunoaga lea ale faletua, na ia ta‘ua ai foi, “E tolu tausaga ua faamalolo ai tofi Faifeau Samoa ole Susuga Misikopa Loli.”
O aulape faapenei ale ekalesia, e lē soona laga, vaganā ai oni mafuaaga tuga ma ogaoga. Ole itu lea sa taumafai ai e fesiligia le Susuga ile Toeaina Faatonu ia Laki Slade i sona finagalo, peitai, e oo mai ile taimi na lomia ai lenei lipoti e lei manuia taumafaiga mo se fesootaiga.
Ose finagalo faaalia ole sui ole ekalesia na faatalanoaina ele Samoa Times na ia ta‘ua ai, e pau lona malamalamaga oloo iai ile mataupu lenei, ole faaiuga na faia ele Autoeaiina, ona ose mataupu lava faalotoifale ile va ole faifeau ma lona faletua.
O laua lava feeseeseaiga faaleulugalii, peitai, ua oo le mataupu ile Toeaina Faatonu o iina lea ua mafua ai ona faia le faaiuga e faamuta le galuega ale susuga ile Faifeau ma lona faletua i totonu ole ekalesia.
Ua faamaonia mai foi, ua mae‘a ona tapena uma ese meatotino ale Faifeau ma lona faletua mai le maota ole galuega. Ua faapea foi ona suia uma ki ole fale ole faifeau faapea le falesa male loka ole faitotoa ole pa oloo siomia ai le fanua ole ekalesia.
Na faaalia foi ele sui ole ekalesia, ua misia le latou mafutaga male Susuga ia Misikopa male Faletua, e tele galuega lelei sa o la faia mole ekalesia.
E iai foi fuafuaga mole atinaeina ole ekalesia mole lumanai ua mae‘a ona latou faataoto ma galulue iai, peitai, o lea ua faafuasei ona faamuta le latou mafutaga.
Na ia ta‘ua foi ole taimi nei ua olo lava le fua male pa‘ō ile latou ekalesia ma usitaia faatonuga ua tuuina atu e taitai ole ekalesia.
