O le afā o Eveni na faaleaga ai le tele o le vaega o le faleaoga a le afioaga o Mulivai i Safata. E tulai mai lea faalavelave faalenatura e sili laititi atu i le to‘a 100 e fanau o loo aoaoina ai i lea aoga tulagalua.
O le tatalaga o le galuega fou na faaalia ai e le alii Palemia, le susuga Tuilaepa Lupesoliai Sailele Malielegaoi, talosia ae avea le tatala o le faleaoga fou ma auala e toe faatosina ane ai fanau a le nuu ua agai ese i le tuai o le galuega.
E lei iai se faamatalaga i le mafuaaga ua tolu lelei ai tausaga talu ona faatali le fausia o lenei galuega se‘i vaganā ai le tulaga lea na faagasolo lava galuega na aofia i lenei fesoasoani a le Malo o Ausetalia. O le aoga tulagalua a Mulivai Safata o se tasi o aoga e fitu ia na fausia uma i le fesoasoani a le Malo o Ausetalia mo aoga sa faaleagaina e le afā o Eveni.
Ta‘ua e le tamaitai pule o le aoga, o Lutia Laulu o le talosaga lea na ave ia Ausetalia e $1.4 miliona tala le tau o le faleaoga ma o le tupe lena na ave uma lava i le konekarate a Alai‘asa Schwartz Hunt e fausia ai le tino o le faleaoga. E na o le tino lava foi e lē o aofia ai ni kesi ma ni nofoa ma ua agai nei foi le aoga e tau saili se fesoasoani ina ia mafai ai ona faatino lea vaega o le galuega lenei.
E $6,000 (tala Samoa) le tupe na aoina e le afioaga ma le komiti o faiaoga ma mātua le PTA e fausia ai se pa tele ua siomia ai nei le faleaoga i Mulivai.
Na faatumulia aiga ma uo aemaise o le aoga i le molimauina o lenei galuega ma sa auai atu ai le Palemia, le Minisita o Aoga le afioga Magele Mauiliu Magele ma sui o le Matagaluega aemaise sui o le Malo o Ausetalia i lenei faamoemoe.
O le unai lava lea a le Malo e pei ona ta’ua e le alii Palemia, le Susuga Tuilaepa Lupesoliai Sailele Malielegaoi, ina ia faamausali faiga faapaaga ma atunuu e pei o Ausetalia i fesoasoani ua mafai ona ofo mai i le atinae o Samoa.
O se tasi lenei o vaega tele o lea fesoasoani a lea malo ua faaauala mai i faleaoga, ma o le faafetai tele na momoli e le taitai o le Malo i le agalelei o Ausetalia ua tino mai ai lenei galuega ma isi galuega tetele o faleaoga i nuu i tua o le atunuu.
O le fautuaga a le sui o Ausetalia i Samoa nei le tamaitai o Sue Langford, ia aogā fesoasoani aemaise le faleaoga e faamautu i ai le fanau ma fesoasoani ai i taumafaiga faaleaoaoga a fanau o le nuu.
Na aofia ai i lenei galuega falelēta‘ua poo faleui faapea ai ma tanevai mo le aoga.
