O le miti a se tasi o aiga ua loa ona tuliloaina o le tuufaatasia lea o sa latou faaili e faaaogāina ai le taleni fai musika a alo ma tama fanau. O le tulaga lea na galulue i ai mātua ma fanau a le Aiga o Smith, Collins, Muliaga ma Tuiletufuga i Sini ma faataunuuina i le po o le Aso Toonai. Na faatumulia le Greyhound i Yagoona mo le faalauiloaina aloaia o le faaili a le Nesian Sounds.
O le itula 6.30 i le afiafi na tatala ai loa faiototoa mo lenei faamoemoe seia oo i le sefululua i le po i ma le feemo o moli lanu aemaise le tu‘i o le faaili. O sui o lenei faaili fou na amata i isi foi faaili i Sini a o lenei tuufaatasiga ua atoa ai tino o tama.
E lē gata i pese faaneionapo na toe faafofoga, faagaeetia ma sisiva malosi foi tamā ma tina matutua i musika mai le 1970 e pei o le KC & Sunshine Band, Punialavaa, Tiamaa. O lenei faaili o loo taulamua ai foi ma le alii pese kalapu ia Taufi Collins (Apia) ua loa ona pese i le Mt Vaea i Lalovaea. O isi sui o le Nesian Sounds e aofia ai Pou Lata, Maiava Sean Smith, Neil Smith, Vaoita Smith, Phillip Leon Tuiletufuga ma Taufi Collins.
E lē gata o le faagaeetia o le aofia i le manaia o le leo o le faaili, ae na faailoa foi le pa‘ū toe taugofie o le tau o loo ofo nei mo Siva ma faaipoipoga aemaise aso fanau e le Nesian Sounds. E lei malolo foi le fola i tagata sisiva auā e tofu lava le augatupulaga ma la latou pese e usuina e le faaili.
O se vaaiga na maofa ai foi tagata, o le gasolo atu a le aofia e momoli la latou faamalo e tauala atu i Siva Samoa lea na atoa lelei le $2,500 Ausetalia i lea lava afiafi ma ua fesoasoani tele mo le amataina o le Faaili fou.
