E lei faavaivai le anoano o tagata na auai i le Maota o le Ekalesia PIPC i Newtown i Ueligitone i le Aso Toonai 12 o Setema e ui ina malulu le aso, ae sa susulu matagofie lava le la o foliga agalelei ma le mafanafana o le Atua i lana fanau atiae.
O lenei faamoemoe o le tatala aloaia lea o le Auaunaga Pasefika i le Laumua (Wellington Region Pacific Services) na atiaeina e ekalesia e tolu o le PIPC i Petone, Newtown ma Porirua.
O Rev Tauinaola Tofilau na taitaia le sauniga lotu na amataina ai le faamoemoe. O ia foi lea ua avea nei ma Taitaifono o lenei auaunaga fou a le Sosaiete.
O le fonotaga amata a le Sosaiete i le aso lava lea na filifilia ai le toafitu o le a faatinoina galuega amata o lenei Sosaiete mo le tasi le tausaga, ona faapea lea ona toe tofia ni isi e faaauauina le auaunaga.
Na mae‘a le sauniga tuumuli le aofia mo le faamae‘aina o le polokalame o lenei aso fiafia i le hall a le ekalesia; le Nokise House.
Sa avea le Sui Pule Pasefika o le iunivesete o Vitoria le afioga ia Luamanuvao Winnie Laban ma malo faaaloalogia sa saunoa faapitoa ai i lea aso taupoina. Na ia faatāuaina le faamalosi mo mea lelei e fesoasoani ai i tagata Pasefika i tulaga tau le soifua maloloina, itu tau aoaoga, ma le fesoasoani lautele lea i tagata Pasefika.
O le fofoga o le aso na feagai lea ma le afioga ia Tapumanaia Faiumu Belford o le failautusi aoao a le ekalesia PIPC i Newtown ma o ia foi o se tasi o le komiti o le Sosaiete.
Avea foi lenei avanoa e momoli atu ai faamanuiaga i le komiti ua tofia e asaina le amataga o le auaunaga. Manuia foi le Sosaiete fou. O o outou māmā na!
