Tatala le auaunaga a le Health Star Medical Centre i Panmure`

Le aso na tatala aloaia ai le HSMC
Le aso na tatala aloaia ai le HSMC

O le susuga i le toeaina ia Reverend Elder Leiite Setefano na taitaia le sauniga sa faapaia ai le nofoaga fou o le Health Star Medical Centre, lea ua iai nei i le taulaga faatau i Panmure, 136 Queens Road, i le Aso Faraile, 27 Novema 2015.

Saunoa le tamaitai pule sili Togiai Vaifagaloa Naseri, “O le auaunaga lenei o fomai faaleaiga (family doctor) o le faaopoopoga lea o galuega faalesoifua maloloina o loo faatinoina e le ofisa o le Health Star Pacific Trust.”

O le Health Star Pacific Trust o se auaunaga tumaoti ua loa tausaga o feagai ma le faalauiloaina o aafiaga i gasegase faapea le logopuialiiina o tagata Pasefika i polokalame e maua ai le fesoasoani tau le soifua maloloina. Lea foi sa faafoeina i le tele o tausaga le polokalame i luga o le Radio Samoa.

O le tatalaina o le Health Star Medical Centre, ua mafai ai nei e o tatou tagata o loo alala i le itu i Sasae o Aukilani e pei o Panmure, Glen Innes, Mt. Wellington, Pakuranga, Glendowie ma St. Johns ona agai i se falemai o loo galulue ai ma pulea e o tatou tagata Samoa ma le Pasefika.

O se isi itu tāua o le iai lea o isi auaunaga i le nofoaga e tasi e pei o le faletalavai, physio ma togafitiga a Saina, aemaise ia le potu mo le faia o fofo Samoa. Ua faataoto nei foi se polokalame a le Health Star Medical Centre mo le 2016, lea ua faia ai siaki faalesoifua maloloina e leai se totogi i lona muafale i Aso Lulu taitasi mai le 9:30am – 12:30pm.

Ua faapaaga ai nei lea polokalame ma le Walking Samoans i Aso Lulu taitasi e ala i le faia o le siaki muamua mo le au savavali a o lei amatalia le savaliga. O se tulaga ua faaalia ai le fiafia tele o le ausavavali a le Walking Samoans a le itu i Sasae.

Mo nisi faamatalaga i auaunaga a le Health Star Medical Centre, valaau le (09) 528-9800.

Faamatalaga na tuuina mai