“Pe ana lē seanoa le faasoa mai o nisi o tamalii ma failauga ole Atunuu aemaise lava i lo‘u Itumalo e le a‘e i fanua le fua ma le manuia”..Faumuina Manu Samuelu
Ua faaopoopo atu i tusitusiga o lauga, solo, Mavaega, Tofiga ma Tala o ‘oa ole gagana Samoa aemaise o ana tu ma aganuu le tusi ale afioga Faumuina Manu Samuelu, ose tamalii ole atunuu ua avea nei ma Failautusi ale afioga ile Minisita o Fesootaiga ma Faamatalaga Faatekonolosi le afioga Afamasaga Lepuiai Rico Tupai.
O Faumuina foi ose tasi ua umia faailoga ma tusipasi ile tomai faatausi soifua. Ole taumafaiga ale tusitala i lana tusi ua faaigoaina ole Tofa Tatala ua tuufaatasia ai nisi o ana lauga i feiloaiga ma folafola ava sa ia faatino i nisi o mafutaga ma feiloaiga aemaise o sii mamalu a nisi o ona aiga i maliu. O nisi o nei lauga sa aoao manogi ai le tusitala mai le tomai o nisi o tamalii ma failauga o nuu ma afioaga ole atunuu.
“Ua ou manatu e tuufaatasia ise tusi ina ia tufa atu ai lenei ‘oa ile atunuu aemaise o tupulaga lalovaoa o Samoa”. Na saunoa foi le afioga Faumuina Manu Samuelu ile faalauiloaina o lana tusi ose luitau lea sa feagai ma ia pe faapefea ona ia faatino le galuega e tufa atu ai lana faasoa ole gagana faafailauga ose matai Samoa i isi mo lo latou silafia ma fesoasoani ai foi i nisi oloo asamo ile fia maua o lea ‘oa.
Ole afioga ile Palemia susuga Tuilaepa Lupesoliai Sailele Malielegaoi na ia tatala le tusi ma sa ia saunoa ai e faapea ole tele foi o nisi o galuega faapenei ua toe aumai ai e isi tusitala mea ua uma ona faamaumau i tusi a isi tusitala.
“O lau luitau lea iai latou oloo fia lenei galuega ia taumafai e aua nei toe aumaia isi vaega o a tatou tu ma aganuu faasino i lauga a tulafale poo ni tamalii ua uma ona tusi e isi, aumai nisi mea fou”.
Ole vaiaso muamua o Ianuari 2017 na tuu faatasia ai e le tusitala ana solo ma tala faapea analauga sa mafai ona fetalai ai i malaga, o faauliufalega ma faaipoipoga. “Sa ou manatu atonu e aoga lou vaivai e maua ai se faamanuiaga mo se isi foi tagata oloo ia manaomia se fesoasoani”.
“Sa ou manatu ose meaalofa sili lea mo au ile atoaga o lou 55 tausaga, ole tuu faatasia o lenei tusi”. Ole susuga ile Faafeagaiga ole Toeaina penisione malolo manumalo ole ekalesia Faapotopotoga Kerisiano Samoa susuga Lale Ieremia na saunia le lotu puupuu na faalauiloa ai le tusi ale afioga Faumuina Manu Samuelu.
