O le aoaoina o le aganuu a Samoa, o le auna lena o le faamoemoe ma le vaai mamao a nisi o tamalii o le atunuu ua latou fuafuaina lenei aoga aua le lautele o Samoa o loo nopiai i Niu Sila nei. O le afiafi o le Aso Faraile 22 o Aukuso na tatala aloaia ai lenei aoga i le hall a le Phap Pacific i Papatoetoe. Na auai nisi o tamalii fai upu a le atunuu e pei o le tofa ia Tologataua Fuataga, faapea le tama matua ia Tuaopepe Aperila, o le tofa ia Lofipo o sui o le polokalame o le “Aoao Malu Manogi o le Lolo” faatasi ai ma nisi o tamā ma tina ma fanau na agai atu e fia iloa ma malamalama i le faatinoina o tiute o le tama talavou ma le teine talavou i taimi o le aganuu faasamoa.
Na tatala le faamoemoe i le tatalo na saunia e le afioga ia Tuaopepe ona sosoo lea ma le ‘ava o le feiloaiga, ona faagasolo loa lea ma le faailoaina o le tagata ma lona suafa ma le afioaga e sau ai. O nisi o tama faiupu o le atunuu ua avea i latou ma faufautua i lenei aoga ma fesoasoani atu e faasoa lo latou silafia i le aganuu a Samoa auā lava tupulaga lalovaoa o le atunuu.
O le faamoemoe o loo iai lenei polokalame e tasi le aso o le vaiaso e faatino ai le aoga ae na o le ono vaiaso e faagasolo ai. E lua itula ua mafai ona faaavanoaina mo lenei aoga. Sa vaaia lava i lea afiafi le sagisagi fiafia o mātua aemaise o tupulaga talavou o tama ma teine na auai, o le toatele foi o i latou na tusitusi nisi o vaega tāua na aoaoina i lea po.
O le afioga ia Su‘a Levaopolo Palea‘e Motusaga mai Gagaifo Lefaga o ia lea o le alii o le nuu a o le tuua o le nuu o le tofa ia Asiata Faumui Faleao Pouniu Letoa Lavea. O nisi o i latou o loo aofia ai i le faatautaia o lenei polokalame o Tumua Tofilau mai Letogo, Tagaloa mai Samatau, Paiutu Mulipola mai Siutu, Faleao Laumoli Lavea mai Satupaitea.
Ae sa fesiligia e le tusitala le tuua o le nuu ia Asiata Pouniu, poo le a le uiga o lenei igoa ua faaiogoaina ai le nuu ua latou faia lenei aoga? Ae na saunoa Asiata o lona uiga, “e fai le aoga ae faaetete foi ia Samoa o le ao mamala o le atunuu tofi,” ae ui i lea ua faia ai se aoga mo i latou o loo fia iloa ma malamalama i le aganuu a Samoa, ae o le a le afaina ai le au fai tofa ma le au fai uta mamao.
O tiute tau i tamaitai, o le paluina o le ‘ava, le sulaina o toga, le folaina o toga, o lana siva Samoa, o ana upu faafeiloai i se mea e valaaulia ai se tamaitai pe a fai e ofisa i se galuega. O galuega tau i alii, e tatau ona ia iloa tautu le ‘ava, ta le fau, tufa le ‘ava, folafola le sua, ailaoina o sua, faatasi ai ma le aoaoina o le faatulima pe a feiloai ma tagata.
O le tiute o le tama talavou e le gata i le tufa ‘ava lana galuega e fai, ae a matai loa ona amata lea i le sufi ‘ava, folafola ‘ava ma le lauga. O nisi ia o vaega tāua o loo taumafai le aoga e momoli i tagata, ia vaevae tonu galuega i lona taimi e faatinoina ai.
Ma o lenei aoga e talia soo se tasi ma e leai se totogi, ae o le naunau o tamalii o le atunuu e faasoa le meaalofa a le Atua e ala i le aganuu a Samoa ua tuuina ia i latou. E le aoaia e Laupua Tamafaiga.
Ua iai foi lo latou faamoemoe o le a faia se faaaliga tele i se aso o i luma e faailoa ai le tāua o lenei aoga i totonu o lenei atunuu.
